Shillong, Nailur 23: U bah James Lyngdoh Working President jong ka Meghalaya Pradesh Congress Committee (MPCC) u la iathuh ba na ka liang jong ka party kan pynlong la shai ka sngi iaka jingialang ban pynbna ia ka kyrteng jong u kyrtong ban ia khun ia ka MLA ilekshon shiteng samoi na ka 26-Shella Konstitwensi.
Haba kren ha u SP News Agency, u Bah James u la ong ba kum ka party kan dang ia shong la shai ka sngi ha ka por jan meit bad ha ka juh ka por kan pynbna ruh ia ka kyrteng jong u kyrtong jong ka party na ka bynta katei ka ilekshon shiteng samoi.
Na kiwei ki lad khubor la iathuh ba ki kyrteng kiba ka party kan ia kren la shai ka sngi ki don ar tylli, kawei jong ka Kong Grace marry Kharpuri kaba dei ka MDC jong ka Nongskhen bad kawei pat ka kyrteng jong u Bah Will Khyllep IAS bala shong thait na ka kam ba dei na ka shnong Mawlong.
