Shillong, Lber 22: Mynta ka sngi u Commissioner bad secretary jong ka sorkar Meghalaya u Bah M R Synrem u la pynmih ia ka jingpynbna ba la shai ka sngi ka 23rd Lber 2020 bad ha ka 26th Lber 2020 la shah ia ki taxi kamai bad ia ki Auto Rickshaws tang 25% ba kin kamai ha surok.
Katba ha ka 24th, 25th, 27th, 28th bad 29th Lber 2020 la khang ia baroh ki ki Taxi bad Auto Rickshaws ba kin nym iaid ha surok ha kitei ki tarik, lada don kam kyrkieh ban leit sha ki jaka sumar hap ban ioh ia ka jingbit na ki ophis jong ki District Transport officer.
Ha katei ka jingpybna kaba la pynmih mynta ka sngi la pynshai ba la shim ia kane ka rai na ka bynta ban iada na u khniang jingpang COVID-19 ha kane ka jylla Meghalaya. Ban lah ban ia khun pyrshah ia kane la hap ban khang ia ka jingpyndon kam ia ki kali kamai.
Kane ka jingmana ban khang ban pyndon kam ia ki Taxi bad Auto Rickshaws kan long ha East Khasi Hills District, West Jiantia Hills bad West Garo Hills District. Kane ka jingmana ia ka jingiaid ki ki Taxi bad Auto Rickshaws ha kitei ki district kan long ha ka 23rd bad ha ka 26th Lber 2020.
Baroh ki Taxi bad ki Auto Rickshaws kiba kamai ha kitei ki ar sngi kin hap ban pynthikna ba ki nongshong kali kim dei ban ia shong jan ki dei ban ia shong kham pajih. La bthah ia baroh ki District Transport officer jong ki District ba kin bud ia kane ka jingpynbna.
