Shillong, Nohprah 09: U Nongialam ba rat bah jong ka seng Congress u ba la mih ha kine ki khyndait bnai ba la dep u Dr DD Lapang la shai ka sngi yn pyniasoh sha ka National People’s Party (NPP) ha ka jingialang paidbah ka ban long ha Nongpoh.
Da kane ka jingpyniasoh u Dr Lapang sha ka seng NPP kan dang pynkhlain shuh shuh ia kane ka party ha shuwa ka ilekshon MP sha Lok Sabha ka ban long ha u snem 2019 bad kum juh ka MDC ilekshon sha ki ar tylli ki iing dorbar thawain jong ki District Council ka KHADC bad JHADC.
Ki thymmei khubor ki iathuh ba ia u Dr Lapang yn pdiang burom sha ka party da u president rangbah duh jong ka seng NPP u Conrad K Sangma u ba dei ruh u myntri rangbah jong ka jylla ha kaba ki nongialam jong ka NPP na kane ka jylla ruh kan ia don lang.
U Conrad K Sangma wat la u Dr Lapang yn pat ai ia ka rai ban pyniasoh sha ka NPP, u la thung ia u kum u wei na ki nongai buid ia u myntri rangbah ka jylla hapoh kane ka sorkar MDA kaba la ialam da ka NPP.
