Jowai, Nohprah 16: U Dr Azad Zaman MLA jong ka Rajabala mynta ka sngi u la leit ban jurip ia ka jaka ba twa ka krem dewiong ha Lumthari ha East Jiantia Hills District ha kaba la antad ba 13 ngut ki briew kila shah ban hapoh krem dewiong.
U Dr Azad la shai ka sngi yn leit ban ia kynduh ia u myntri rangbah ka jylla u Conrad K Sangma ryngkat kiba ha iing ka sem jong kito kiba la khlad ban ai ia ka dorkhas sha u ban dawa na ka sorkar ba dei ban ai bai lutksan ia kiba khlad ha kane ka jingtwa ka krem dewiong ha Lumthari ha Jiantia Hills.
Ha ka ne ka jingleit u Dr Azad u la ia kynduh ia ki bor pulit kiba dei na ka 1Bn jong ka NRDF ban ia kren bad ki halor kane ka jingjia ba sngewsih ha kaba 13 ngut ki mynsiem briew la ngeit ba kila duh ei ia la ka jingim jong ki ha kane ka jingtwa kane ka krem dewiong.
U Dr Azad Zaman u la iathuh ba ha ka jingleit jong u mynta ka sngi sha katei ka jaka ba don ka jingtwa ka krem dewiong, u la ong ba u la lap ba don tang kawei ka kot pump um bad kane kam pat long kaba biang ban ring ia ka um na katei ka krem bad mynta ka sngi kila wanrah sa kawei ka kor pump um.
Na ka liang jong u Dr Azad, u la bethah ia u Deputy Commissioner jong ka East Jiantia Hills ba u dei ban pynbiang ia ki jingdon kam ki kor ki bor ban tan ia ka um ban dup lah ban ioh sei ia ki briew kiba la shah ban hapoh kane ka kam.
La ong ba ki nongngam um kiba lah ban ngam ka long tang 30 phut nalor kata kim lah bad lada lah ban ring noh ia ka um ki lah ban ngam kham sha poh bad leh se lah ban sei ia ki briew kiba don hapoh kane ka krem dewiong.
Na ka liang jong u kum u MLA u la thoh sha u Chief secretary jong ka sorkar jylla ban ai jingiarap ia kine ki briew kiba la duh ei ia la ka jingim ha kane ka jingleit bylla tih dewiong bad ia kane ka juh ka shithi la ai ruh sha u DC kum ka jingpyntip.
U Dr Azad u la iathuh ba na kitei ki 13 ngut kiba la ngeit ba kila khlad ha kane ka jingshah ban ha kane ka jingtwa ka krem dewiong, hynniew ngut ki dei na konstitwensi jong u na Rajabala bad kaba sngewsih ka long lai ngut ki dei na ka juh ka iing.
