Shillong, Lber 21: Mynta ka sngi ka Shillong Municipal Board kala phah ia ki briew jong ka ban syn
reit dawai ia ka Iewduh bad ia ki sawdong jong ka ia kane ka leh ha ka por mynstep mynta ka sngi.
Haba u SP News Agency u la ioh ban kren bad u Chief Executive Officer jong ka Shillong Municipal Board, ban kylli kiei ki jaka kiba la synreit dawai mynta ka sngi, la ong ba ia ka jingtip kaba bniah yn sa dang pyntip.
Ka jingsynreit ka long ha ki bynta jong ka them iew Mawlong, ka Motphran ter ter shaduh stand Jeep, ka platan Bazar bad ka khlieh Iewduh, kane ka jingsyreit dawai ka dei kum shibynta ban wanrah ia ka jingiada na u khniang jongpang COVID-19.
Mynta ka sngi baroh ki iew ki hat la khang ha poh jong ka East Khasi Hills District baroh kawei wat ha ki shnong ki thaw kam shym da don eh kata ka jingialum briew, ki kala don tang katto katne tylli eh ki kali kiba iaid ha surok.
Ki paidbah nongshong shnong kila ai ka jingiatreilang bad ka sorkar ha kane ka sngi ban ialeh pyrshah ia kane ka jingpang kala la pynkhynniuh ia ka pyrthei baroh akwei.
Ha ka khubor jong u mytnri Rangbah ka jylla u la ong ba wat la ka jylla Meghalaya kam pat don ba ioh ia kane ka jingpang hynrei kaba kongsan ka long ban phikir bad ban iada. La kyntu ia ki paidbah ba kin nym syier hynrei ki dei ban sngap ia ki jingbthah.
U Bah BS Sohlya Chief Executive Officer jong ka Shillong Municiapal Board u la iathuh ba kane ka jingsynreit dawai kan long tang mynta ka sngi, ha ki sngi ban wan kin dang hap ban ia peit lada don kam ban synreit ki sa leh.
