Shillong, Nailur 22: U Director ka tnad ka koit ka khiah mynta ka sngi u la iathuh ba baroh kiba test COVID-19 positive ki long 58 ngut, East Khasi hills 45, Ri Bhoi, 5, South West Garo Hills 1, West Jaintia Hills 1, kiba shitom baroh ki long 2047 ngut ha ka jylla baroh kawei.
Kiba la koit mynta ka sngi ki long baroh 179 ngut bad haba khein ha ka jylla baroh kawei kiba la koit na ka jingpang COVID-19 kila kot sha ka 2706 ngut. Kiba khlad haduh mynta na kane ka jingpang kila kot sha ka 38 ngut.
Halor ka jingkynnoh ban ong ba ka sorkar ka kwah ban pynkiew khnang ia ka jingbun kiba pang COVID-19 ban ioh kham bun ka jingbei pisa ka long kaei kaei kaba bakla bad kane kam long kaba shisha haei haei ruh.
Na ka liang jong u Director u ka kyntu ia baroh ba ki briew ki kiar na ka jingkynthoh kaba khlem nongrim bad kane ka dei ka khana shukor bad ka dei ka khana tang ban pynbud nam ia ka sorkar.
Na ka liang jong u Director ka tnad ka koit ka khiah u la ong ba kane ka dei ka jingpynshai ba ki briew ki dei ban kiar bad lada ki dang mih nangne sha khmat ka tnad ka koit ka khiah kan nym shong kli kti hynrei kan sa leh ia kaba don kam ban pynphai.
