Shillong, Jylliew 24:Ki liang pyrshah hapoh ka iing dorbar Ka KHADC kila mih jyndat napoh ka iing dorbar kum ka dak jong ka jingpyrshah ia Executive Committee jong ka VPP kaba la ialam da u bah Shemborlang Rynjah namar ba ka khlem pynrung ha ka mang tyngka ia ki 43 ngut ki nongtrei kiba la shah pynhiar kyrdan ha kane ka mang tyngka 2025-26 ka ban sdang naduh u Naitung 2025 bad kan kut ha ka 31/Lber/2026.
U nongialam ka liang pyrshah u bah Titosstarwell Chyne u la kdew ba ha ka mang tyngka kaba lai bnai kaba la pdiang da ka iing dorbar ka kynthup lang ia ka mang tyngka ban siew tulop ia ki 43 ngut ki nongtrei bad la buh ki jingkylli balei mynta ha kane ka mang tyngka kam shym la don ka jingmang pisa ban siew tulop kum ka jingpyrshah ia ka jingleh ka EC kila mih jyndat noh shabar ka iing dorbar.
U shongknor ka iing dorbar u bah Strongpillar Kharjana haba iohi ia kane ka jingmih jyndat jing kine ki liang pyrsha u la pynsangeh noh shipor ia ka jingiashong dorbar haduh ka 2 baje nohphai sngi.Hadien katei ka por ba la buh ka iing dorbar kala shong biang hynrei ki liang pyrshah kim shym la iashim bynta .
Ha kane ka sien shong dorbar hadien ka 2 baje la wanrah ia ka mang tyngka hapoh ka iing dorbar ha kaba ki liang pyrshah kim shym la iadon lang, na ka liang synshar baroh ki MDC kila iadon hapoh ka iing dorbar ha kaba ka iing dorbar kala pdiang ia ka jingwanrah ia ka mang tyngka mynta ka sngi, ia kaba ka iing dorbar kan dang iakren bniah ha ka 25/6/2025 bad yn pdiang pat ia kane ka mang tyngka 2025-26 ha ka 26/6/2025.
