Shillong, Nohprah 10: U Shongknor jong ka Mawmluh Cherra Cement Limited u bah Wailadmiki Shylla u la ong ban pyniaid ia kane ka karkhana shna dewbilat jong ka sorkar don kam ban bei pisa haduh T.180 klur lada ka sorkar kan dang pyniaid ia ka ia kaba ka sorkar kan nym lah.
Haba kren ha ki lat pathai khubor u la ong ba lada leh kumba leh mynshuwa ban shu maramot shiteng shiliang kan nym lah ban iarap ia ka MCCL, ka jingeh jong ki nongtrei kam iai bteng kumba ka long mynta ban pynlait ia kane ka jingeh ka sorkar kala buh lait tylli ki lat.
Kawei ban bei pisa T.180 klur ban pynim biang ia ka MCCL ia kaba ka sorkar kan nym lah ban leh na lade, kawei ka long ban iatrei lang “Joint Venture” bad ki kompnei, kane kaba ki dang ia kren mynta bad kaba lai ka long ba lada kim pdiang ia jingiatreilang bad kiwei ki kompeni lahap ban khang khyrdep ia ka MCCL.
La ong ba naduh ba la pynkylla iakane ka karkhana pynmih dewbilat na ka “Wet process” sha ka “Dry Process” ka sorkar kala pynlut haduh T.324 klur ha ka MCCL kane ka long naduh bala sdang ha u snem 2006 haduh mynta 2020.
Katkum ka jingpynkhreh ha kaba shna ia kane ka “Dry Process” ka MCCL ka dei ban pynmih dewbilat 600 tone ha ka sngi sngi bad ha ka shibnai kam dei ban duna ia ka 15000 MT, dei tang ha u bnai Lber 2019 ba kane ka karkhana ka pynmih 10000 Mt bad ha u bnai ba bud pat ka khlem pynmih ei ei shuh.
Kane ka karkhana dewbilat kala sangeh trei kam naduh u bnai Lber 2020 ba wan noh kane ka khlam COVID-1 haduh mynta kam shym pynmih dewbilat shuh kane ka karkhana.
