Shillong, Jymmang 14: Ka Jaintia Students’ Union (JSU) mynta ka sngi ba-ar ka la dawa ba lada jied ia ka Tura kum ka Winter Capital jong ka Jylla Meghalaya, kumta ka Jowai ka dei ban ai ia ka kum ka Summer Capital.
“Ka Meghalaya ka dei ka jaka sah ki lai tylli ki jaidbynriew riewlum ba kynthup ia ki Jaintia, ki Khasi, bad ki Garo. Kumta dei ban leh mar ryngkat ia baroh ban pynneh ia ka jinglong hok bad jingiatylli ha ka jylla,” la ong ka JSU ha ka kyrwoh.
Ka JSU ka la pynpaw ia ka jingshisha ba ka thain Jaintia Hills ka dang sah ha ka jingduna bad ka dang iai bteng ban iakynduh ia ki jingeh kiba khraw ha ka liang ki jingtei bapher bapher.
“Ha kane ka jingïadei, ka jingai ïa ka Jowai ïa ka kyrdan kum ka nongbah jong ka summer capital kan ym kyntiew tang ïa ka roi ka par kaba ïahap hynrei kan pynthikna ruh ïa ka jingïaryngkat hapdeng ki jaidbynriew,” la ong ka.
Ka union ka la maham shuh shuh ba kano kano ka jingleh jong ka sorkar jylla ban ai ia ka kyrdan nongbah jong ka aiom sha kawei ka thain katba kam pat kynthup ia ka Jaintia Hills kan wanrah ia ka jingbym sngewhun kaba la saphriang kylleng.
Lada kum kane ka jingbym iahap ka dang iai bteng, ka Synjuk ki Samla Pule Jaintia, ryngkat bad ki paidbah jong ka thain, kin hap ban pynlong ia ki jingiakhih bad ki jingiakhih paidbah ban dawa ia ka bhah kaba dei hok jong ki.
Ka Jaiñtia Students’ Union ka la pynpaw ruh ba lada kum kane ka jingbym ïahap ka mih, ka union bad ki paidbah ka thaiñ kin nym shong kli kti. Kin ialeh tyngeh ban ioh ia ka bhah kaba dei hok jong ki da kaba dawa ban seng ia la ka jong ka nongbah kaba iadei bad ka aiom ha ka jylla .
