Shillong, Nailar 25: Ka Ophis jong ka Nehru Yuva Kendra Sangathan (NYKS), Shillong, Ministry of Sports and Youth Affairs, Government of India ryngkat ka jingiatrei lang bad ka Seng Samla Pynursla ka la pynlong ia jingrakhe ia jingiatylli mynta u bnai ha Shnong Pynursla ha ka jingiadon ryngkat jong ki National Youth Corp (NYC) jong ka Pynursla Block kata U samla Heavenes Star Mawkon bad ka samla Ibalarilang Khongsni.
Shuwa jong kane ka jingialang la ioh ban pynlong ia ka jingiathung dieng ha kaba la ia shimbynta da ki dkhot ka Seng Samla Pynursla ryngkat bad ki National Youth Corp (NYC) kiba dei peit ia kane ka Block.
Hadien ba la dep thung dieng la ioh ban pynlong sa ia kawei pat ka jingialang ha kaba la pyniaid da U Bah Baniakyrshanlang Lyngdoh uba long uwei na ki dkhot jong ka Seng Samla Pynursla. Kiba la ai jingiakren ha kane ka jingialang ki long u Bah Ioannis Khriam iba long u Secretary jong ka Dong Iew Pynursla uba la ai mynsiem bad pynshlur ia ki samla ba kin mih shakhmat la ha kino kino ki kam kiba bha hapoh ka shnong bad ka imlang sahlang.
Hadien la ioh sa ia ka jingkren na U Samla Heavenes Star Mawkon uba dei ruh u National Youth Corp hapoh ka Pynursla Block uba la pynshai shaphang kaei ka NYKS bad kiei ki kam kiba ka don ha kaba iadei bad ki Samla hapoh ka Ri. U la batai ruh shaphang ka jingiatylli kaba u iathuh ba la rakhe.
Haka 20 tarik Nailar man la ka snem kum ka Sadbhavna Diwas hapoh ka ri india baroh kawei. Kumjuh ruh u la pynshlur ia ki samla bad ia ka thain Ri war hi baroh kawei kiba don hapoh ka Pynursla Block ban mih sha khmat ha ki kam babha ym ban shaniah tang ha ki Rangbah Shnong namar ki samla ki long ka Lawei jong ka Shnong ka Thaw bad ka thain hi baroh kawei ha kaba u la ong Lada khlain ki samla ka khlain ka shnong ka thaw.
Ha kaba ai ia ka jingkren ai khublei da ka Samla Ibalarilang Khongsni kaba la ai khublei ia baroh naduh ki Rangbah Shnong bad ka Seng Samla ha kaba ka la ong ba ka jingiashimbynta lang u samla Heavenes Star Mawkon ha kane ka program uba na ka shnong Nongjri ka dei kawei ka dak jong ka jingiatylli kumta sa shisien ka khot ka wer ban long barabor kiba iatylli la ka long ha kino kino ki kam babha ha ka imlang sahlang.
