Shillong, Lber 03: Ka Myntri ba dei peit ia ka tnad ka koit ka khiah ka Dr Ampareen Lyngdoh haba jubab ia ka jingkylli u nongialam ka liang pyrshah u Dr Mukul M Sangma u la ong ba ka sorkar ka kwah ban sdang noh ia ka Shillong Medical College mynta u snem lada ioh noh ia ka jingmonjur na ka National Medical Council ka sorkar pdeng.
Ka sorkar Meghalaya lyngba ka tnad ka koit ka khiah ka kwah ban sdang noh ia ka Shillong Medical College da ka jingthmu ban pynkhlain ia ki lad ai jingsumar ha ka jylla bad ka jingpynkhreh ka la dang iaid shaphrang ha Pasture Institute Shillong.
Ka Myntri ka la iathuh ruh hapoh ka iing dorbar, ki briew ban pyniaid ki la don, la pyndonkam ia ka tnad wad bniah ka koit ka khiah ban long ka ophis treikam bad ki iing ki sem jong ka Pasture Institute kan long ka jaka ai jinghikai.
Ka sorkar jylla kala apply sha ka skul bah NEHU ban ioh ia ka jingithuh na ka bynta ka Shillong Medical College, ka sorkar kala iaid shaphrang ha ka jingpynkhreh ban sdang ia ka Shillong Medical College mar ia ioh ia ka jingbit na ka NMC.
