Shillong, Lber 20: U Bah Samuel Hashah mynta ka sngi u la thep nomination ban ia khun ia kane ka MP ilekshon sha Lok Sabha kum u kyrtong shimet na ka 1-Shillong Parliamentary Konstitwensi ha khmat jong u Returning Officer u Abhishek Bhahotia ha Shillong.
Haba kren ha ki lad pathai khubor ha dien ba la dep ban thep ia ka nomination jong u, u Bah Hashah u la ong ba ka kam kaba ha khmat ka jong u lada u shah jied kum u MP sha Lok Sabha ha kane ka kynti kaba mynta u la ong ban ia kren ia ka kam pud kam sam kaba dang sah teng haduh mynta bad ka jylla Assam.
Kawei pat ka mat kaba un rah hapoh parliament ka dei ha ka rep ka riang, u la ong ba ka long kaei kaei sngewsih ban iohi ba ka rep ka riang ha kane ka jylla ka dang long ha ka juh ka juk rim da kaba pyndon kam da u mohkhiew katba ha kiwei ki jylla kila pyndon kam da ki powertiler.
U la ong ba ka ILP ka dei kawei na ki mat kiba don kam ban ia kren hapoh parliamentary da ka jingia kren ia sngewthuh bad ka sorkar jylla. U la ong ba na ka liang jong u u pyrshah tyngeh ia ka CAB ba kane dalei laei kan nym trei kam.
