Shillong, Nailar 28: U myntri khynnah ka sorkar pdeng ba dei peit ia ka Ministry Social Justice and Empowerment u Ramdas Bandu Athawale, haba kren ha ka jingialang jong ki nonghikai skul Adhock ha Madan Malki, u la ong “Lada phi kyrshan ia ka Pakistan, to khileit sha Pakistan”.
U Ramdas myntri ka sorkar pdeng, u la kren ia kitei ki ktien haba u pynshai halor ka pynduh noh ia ka Article 370 na ka jylla Jammu bad Kashmir da kane ka sorkar NDA hapoh ka jingialam jong u Narendra Modi.
U la ong ba bun bah ki briew kila pyrshah ia kane ka jingweng noh jong ka sorkar ia ka Article 370 na katei ka jylla, hynrei ki trai shnong Jammu bad Kashmir ki pdiang ia kane ka jingleh jong ka sorkar namar ki kwah ia ki kam pynroi.
La ong ba naduh ba la weng ia ka Article 370 ha ka 5/08/2019 ka Jammu bad Kashmir kala shong suk kam don jingklumar shuh, namar ki lehnoh kiba wan dei na Pakistan, mynta lada u lenoh u mih yn nym leit phai shuh.
“Ngan nym lah ban kyrshan ia u Rahul Gandhi, hynrei ka party Republican Party of India (RPI) bad ka NPP ki kyrshan ia kane ka sorkar NDA bala ialam da u Narendra Modi, kane ka sorkar jong u Modi ka ai ka jingkyrshan ia baroh, ki Hindu, Muslim, Khristan, ki Jain bad baroh ki jaitniam.
Haba ia dei bad ki jingeh jong ki nonghikai kumba kila ai ia ka dorkhas ha u mynta ka sngi, yn sa ia kren bad u myntri ba dei peit ia ka Ministry Human Resource Development bad un sa thoh sha u Myntri rangbah duh jong ka Ri India ryngkat ka jingiatrei lang ba u myntri rangbah ka sorkar jylla Meghalaya.
