La ai bor ka MHA sha ki sorkar Jylla bad ki UT ban shim rai halor ka jingplie ia ki skul

New, Delhi, Nailur 30: Ka Tnat Kam Pohiing jong ka Sorkar Pdeng (MHA) ka lah pynmih jingbthah ba thymmai mynta ka sngi, na ka bynta ban plie shuh shuh ia ki kam ha ki jaka ba hap shabar ki Containment Zone. Ha kine ki jingbthah, ban sdang treikam naduh ka 1 tarik Risaw, 2020 la bteng shuh shuh ban plie ia kiwei kiwei ki kam.

Ki jingbthah ba thymmai ba lah pynmih mynta ka sngi ka shong katkum ka jingai jingmut ba lah iohpdiang na ki Jylla bad ki UT, bad ka jingiaphylliew jingmut sani bha kaba lah pynlong bad ki Tnat Sorkar pdeng bad kiwei kiwei ki Tnat.

Ki mat ba kongsan jong ki jingbthah ba thymmai, Ki kam ba lah pyllait naduh ka 15 tarik Risaw 2020, ha ki jaka ba don shabar ki Containment Zone.

Lah shah ia ki Cinema, theatre bad multiplex ban plie biang da kaba pynthikna ba tang shiteng ki briew ki rung ha kine ki jaka, bad ia ka SOP na ka bynta kane yn sa pyllait da ka Tnat Information & Broadcasting. Lah shah ban plie ia ki Business to Business (B2B) Exhibition, bad ia ka SOP halor kane yn sa pyllait da ka Tnat Commerce.

Lah shah ban plie ia ki jaka jngi (Swimming pool) ba pyndonkam na ka bynta ka jingai jinghikai ia ki nongialehkai bad ia ka SOP halor kane yn sa pyllait da ka Tnat Youth Affairs & Sports (MoYA&S). Lah shah ban plie ia ki park bad kiwei kiwei ki jaka ba kum kine bad ia ka SOP halor kane yn sa pyllait da ka Tnat ka koit ka khiah jong ka Sorkar pdeng (MoHFW).

Ka jingplie ia ki skul, college, ki jaka pule bad ki jaka ai jinghikai, Na ka bynta ka jingplie biang ia ki skul bad ki jaka ai jinghikai (coaching), lah ai bor ha ki Sorkar Jylla bad UT ban shim ia ka rai hadien ka 15 tarik Risaw, 2020. Ia kane ka rai yn shim hadien ka jingiaphylliew jingmut bad ki bor pyniaid skul/jaka pule, katkum ka jingpeit bniah jong ki halor ka jinglong jingman, bad katkum ka jingbud ia ki kyndon.

Yn dang bteng bad pynshlur ia ki rukom ai jinghikai online. Katba ki skul ki pynlong ia ki jingai jinghikai lyngba ki bor internet (online classes), kumta lah shah ia ki khynnah kiba kwah ban iashim bynta ha ki online class ha ka jaka ban leit hi dalade sha skul. Ki khynnah pule ki lah ban leit sha ki skul/jaka pule tang lyngba ka jingthoh na ki kmie ki kpa kiba ai jingbit halor kane. Ym dei ban pyntreikam ia ka Attendance, bad kane ka shong baroh ha ka jingai jingbit jong ki kmie ki kpa.

Ki Jylla bad UT kin pynkhreh la ki jong ki SOP halor ki sienjam ba iadei bad ka koit ka khiah bad ka jingshngain na ka bynta ka jingplie biang ia ki skul/jaka pule katkum ka SOP ban sa pyllait da ka Tnat School Education and Literacy (DoSEL), Tnat Pule puthi jong ka Sorkar Pdeng, da kaba buh jingmut ia ki jingdonkam ba iadei bad ki jylla. Ia ki skul kiba lah shah ban plie, hap ban pynlong kongsan ba kidei ban bud ia ki SOP ban pynmih da ki Tnat Pule Puthi jong ki Jylla bad UT.

Ka Tnat Higher Education (DHE), ka Tnat Pule puthi jong ka Sorkar Pdeng ki lah ban shim ia ka rai halor ka por ban plie ia ki college, ki jaka pule Higher Education, ha ka jingiaphylliew jingmut bad ka MHA, da kaba pynshong nongrim halor ka jingpeit bnai ia ka jinglong jingman. Yn dang bteng bad pynshlur ia ka jingai jinghikai online. Hynrei yn shah ha ki jaka pule higher education tang ia ki research scholar (Ph.D) bad ki samla pule post graduate kiba pule ia ka science bad technology kiba donkam ban treikam ha ki laboratory.

Ia kine yn shah naduh ka 15 tarik u Risaw kumne hapoh: Ia ki jaka pule higher education kiba bei tyngka da ka Sorkar Pdeng, ki nongpyniaid ia kine ki jaka pule kin pynthikna ba ka don ka jingdonkam shisha ia ki research scholar (Ph.D) bad ki samla pule post graduate ha ka science bad technology ba kin trei na ki laboratory.

Na ka bynta baroh kiwei kiwei ki jaka pule Higher Education kum ki skul bah ha ki jylla, ki skul bah ba pyniaid da ki riew shimet bad kiwei kiwei, ki lah ban plie tang na ka bynta ki research scholar (Ph.D) bad ki samla post graduate kiba pule ha ka science and technology ba kin trei na ki laboratory katkum ka rai ba lah shim da ki Sorkar Jylla bad UT.

Ki kyndon na ka bynta ki jingialang, Ia ki kynhun ka imlang sahlang, ialehkai, pyni rong, kolshor, niam bad ki kam sain pyrthei lah dep ai jingbit lypa ban pynlong jingialangban  nym tam ka 100 ngut ki briew, tang shabar ki Containment Zone. Mynta lah ai bor ia ki Sorkar Jylla bad UT ban ai jingbit ia kum kine ki jait jingialang da kaba shah tang haduh 100 ngut ki briew, shabar ki Containment Zone, hadien ka 15 tarik Risaw, 2020, da kaba bud ia kine ki kyndon.

Ha ki jaka bym dei habar, lah ban long jingialang tang 50% ka jinglah pynrung briew kine ki jaka bad ka bym tam 200 ngut ki briew. Ka jingdeng ia ki jingda khmat, ka jingpynthikna ia ka jingiajngai iwei ia iwei, ka jingleh ia ka thermal scanning bad ka jingsait kti kalong kaba donkam.

Ha ki jaka ba don shabar, yn peit thuh ia ka jingheh jong ka jaka pynlong jingialang, bad da ka jingbud pyrkhing ia ka jingpyniajngai iwei na iwei, ka jingdonkam ban deng ia ki jingda khmat, ka jingleh ia ka thermal scanning bad ka jingsait kti lane jingpyndonkam ia ka sanitizer.

Ban pynthikna ba kum kine ki jingialang kim pynpur ia ka COVID-19, ki Sorkar Jylla/UT kin sa pynmih ia ki SOP ba bniah ban khmih ia kum kine ki jingialang bad ban pyntreikam pyrkhing ia ki.

Baroh ki kam, lait noh kane harum, lah shah shabar ki containment zone: Ka leit ka wan ki passenjar nabar ri, lait noh kiba lah ioh jingbit na ka MHA. Yn dang bteng ban pyntreikam ia ka jingpakhang dam ha Containment Zone haduh ka 31 tarik Risaw, 2020.

Yn buh dak ia ki Containment Zone da ki bor pyniaid Distrik ha ka micro hadien ba lah khmih ia ki jingbthah jong ka MoHFW da ka jing thmu ban pyllait na ka jingiabit ia u khniang jingpang. Yn pyntreikam pyrkhing ia ki sienjam ba iadei bad ka jingtehlakam ha kine ki containment zone bad yn shah tang ha kaba iadei bad ki kam ba kongsan.

Hapoh ki containment zone, yn bat u pud u sam ba khlain bad yn shah tang ia ki kam kiba kongsan.Ia kine ki Containment Zone yn pynbna ha ki website jong ki District Collector bapher bapher bad da ki Jylla/UT bad yn ai jingtip sha ka MOHFW.

Ki Jylla kim dei ban pyntreikam ia kino kino ki jingpakhang dam shabar ki Containment Zone, Ki Sorkar Jylla bad UT kim dei ban pyntreikam ia kano kano ka jingpakhang dam ha ka thain Jylla, Distrik, sub-division, nongbah, ki shnong, kiba don shabar ki containment zone, khlem ka jingiamir jingmut bad ka Sorkar Pdeng.

Kam don ka jingpyrkhing halor ka iaid ka ieng hapoh Jylla bad hapdeng ka jylla, Kam dei ban don ka jingpyrkhing ha ka iaid ka ieng ki briew bad ka jingkit ia ki mar hapoh bad hapdeng ka jylla. Ym donkam la ki jong ki jingpan jingbit, e-permit na ka bynta kane.

Ki jingbthah na ka Sorkar pdeng halor ka jingiada na ka khlam COVID-19, Yn dang bteng ban bud ia ki jingbthah jong ka Sorkar Pdeng ha baroh kawei ka ri ha kaba iadei bad ka jingiada na ka khlam COVID-19, da kaba pynthikna ia ka jingpyniajngai iwei na iwei. Ki dukan ki donkam ban pynthikna ka jingiajngai hapdeng ki nongthied. Ka MHA kan peitngor ia ka jingpyntreikam pura ia kine ki jingbthah.

Ka jingiada ia ki briew kiba kham don ha ka jingma, La ai jingmut ia ki briew kiba kham don ha ka jingma, kata, ki briew kiba la don 65 snem shajrong, ki briew kiba don kiwei kiwei ki jingshitom ha ka met, ki longkmie kiba armet, bad ki khynnah kiba hapoh 10 snem ka rta ba kin shong beit ha iing, lait noh tang haba pynbiang ia ki jingdonkam ba kongsan bad na ka bynta ki kam ba iadei bad ka koit ka khiah.

Ka jingpyndonkam ia ka app Aarogya Setu, Yn dang bteng ban pynshlur ban pyndonkam ia ka mobile application Aarogya Setu.

What Next?

Recent Articles

Leave a Reply

Submit Comment

*