Shillong, Naiwieng 28: Ki nongialam jong ka seng Meghalaya Asha Workers Union (MAWU) kila leit sha Mawkyrwat ban ia kynduh ia ki briew kiba peit ia ka Mawthawpdah PHC bad Wahkaji Sub-Centre ban wat jingtip ba balie ki nongtrei Asha hapoh kine ki ar tylli ki jaka ai jingsumar jong ka sorkar kim shym la ioh ia ka bainong jong ki naduh u snem 2017 haduh mynta 2019 lai snem lynter.
Ka kong M.June Myrsing general secretary jong ka Union kala iathuh ba ha katei ka jingleit kila ia kynduh ia akkountant jong ka Mawthawpdah PHC bad ha kane ka jingiakynduh la iathuh ba mynta la ai snem khlem ioh pisa dei na kane ka daw ba ki khlem lah ban siew ia ka AVS kaba ki nongtrei ki dei ban ioh man u bnai.
La iathuh ba ha ka jingshisha ka AVS kaba ki dei ban ioh lada shim ia u snem 2016 ruh ka dei ban long T.1000/- tyngka man la u bnai lait noh ka MMBS, kaba sngewsih ka long ba ki Asha kiba hap hapoh jong katei ka jaka sumar sorkar ki ioh tang T.150/- lane T.150/- tyngka.
Kaba ki khlem ioh ei ei ka long naduh u snem 2017 haduh mynta 2019 lai snem lynter. Ha katei ka jingleit kila ia kynduh ia u Block Programme Manager ba dei peit ia ka South West Khasi Hills District, na ka liang jong u ruh u la iathuh ba ki khlem ioh pisa ei na kane ka daw ki khlem ioh ban siew.
Ka Kong Myrsing general secretary kala ong ba kane ka jingleh ka long kaba yn nym lah ban pdiang ba kumno kiwei ki Asha kiba dei ha ka juh ka District ki ioh katba ki Asha kiba hap hapoh jong ka Mawthawpdah kim ioh kane ka dei ka jingleh kaba yn nym lah ban pdiang kala ong. Kum ka Union kan nym shong thiat ban ialeh ban pynioh ia ka hok jong ki nongtrei Asha ha ka jylla.
