Shillong, Nohprah 16: Ka Assembly Committee on Empowerment of Women (ACEW) hapoh ka jingialam jong ka Dr Ampareen Lyngdoh kum ka Chairman ryngkat ki dkhot jong ka kommittee kila leit kylleng ka jylla ban jurip ia ki hospital sorkar.
Kane ka kommittee kala sdang ia ka jingjurip jong ka na ka Ganesh Das Shillong, Civil Hospital Ialong Jowai, ka Community Health Centre ha Resubelpara bad ka Public health Centre ha Songsak ha Garo Hills.
Ha kane ka jingleit ka kommittee kala ia kynduh ia ki nongtrei ha kitei ki jaka ai jingsumar jong ka sorkar ban ia kren ia ki jingeh kaba ki ia kynduh. Ha kane ka jingiakren la sngewthuh ba ka don ka jingduna ki nongtrei, ki kor puid briew, ki kor Xray, ki Ultrasound mashin.
Haba ia dei bad ki nongtrei ki don ka jingduna ha ka liang ki iing sah jong ki nongtrei ha ki jaka ai jingsumar jong ka sorkar kane ka jingeh kaba ki nongtrei ki ia kynduh. Ka Kommittee ka lap ruh ba jur bha ka jingiap jong ki kmie bad ki khunlung ha ki nongkyndong ha ka por leit kha khun.
Na ka liang jong ka Kommittee kan sa ai ia ka kaiphot sha u shongknor jong ka iing dorbar thawain jong ka jylla bad ban rah ia kane ka phang hapoh ka iing dorbar ha ka dorbar mang tyngka jong u snem ban wan.
