Shillong, Jymmang 22: Hiar jurip ka KSU Mawthadraishan Circle ia ka Pathew PHC kum shibynta ban pynkheh ia ka jingiakhun pyrshah ia ka COVID-19, ha kane ka jingleit jurip la lap ba biang tang ki Oxygen.
Ka KSU ka Shem bun ki jingduna ha baroh ki liang, pynpaw u doctor ba donkam kyrkieh ia ka Ambulance bad ki kamra thiah kiba kyrpang, ha kane ka jingleit jurip la ialam da u samla Jibarpaul Thabah u President ha rynkat ki katto katne ki dkhot.
Ki nongialam ka KSU ki la ioh ban leit jngoh ia ka Pathew PHC kum shibynta ban leit jurip ia ki jingbit jingbiang katei ka jaka sumar nabynta ban pynkhreh ia ki jingdonkam ha kaba iadei bad ka jingpur sted ka Khlam Covid-19.
Ha katei ka jingleit jngoh ka Seng ka la lap ba ki Oxygen ki la biang, lait nangta baroh ki jingdonkam ki dang duna bad shem shitom lada jia ba ka khlam kan kiew kynsan ha kano kano kapor.
Ha katei ka sngi ka seng ka laioh ban ia kren ruh bad u Doktor ba dei peit ha katei ka ja ka Sumar, u la ong ba dang donkam shibun ban pynkhreh kum ki kamra thiah jong ki nongpang ba ym lah ban pynthiah lang ia kiba ioh Covid-19 bad ia kiba ioh kiwei pat ki jait jingshitom namar ba ka building ne kamra kaba rit palat.
Ki kamra trei kam jong ki Nurse ba haduh mynta ka don tang kawei la da jia ba ioh jingpang iwei baroh kin sa ia kem pang lut, bad na ka liang jong u ruh u la pynpaw ba u la pyrshang ban thoh bunsien sha kiba halor haduh mynta ym pat ioh jubab ha kaba iadei bad ki jingdonkam ha katei ka ja ka sumar, U la pynpaw ruh ia ka jingeh ha kaba iadei bad ka jing bym don ki Ambulance, haduh mynta kadon tang kawei kaba la rim ka bym lah shuh ban shakri ia ki paitbah ka thaiñ.
Ka Seng lyngba kane ka kyrwoh na U President ka la dawa na ka Sorkar ba kadei ban pynbiang lut ia ki jingdonkam baroh ha shwa ba ka umsaw kan wan tyllep ha katei ka thaiñ, namar ki ba ioh ia ka jingpang ym dei tang ia kiba sah sha ki jaka Sor hynrei wat sha ki jaka kyndong ruh mynta la suh thied bad pur sted kane ka jingpang.
