New Delhi, Nailur 01: Ki stad peit khlur jong ka Ri India ki lah lap ia kawei na ki galaxy ba jngai tam ha kane ka sla pyrthei, ia kane la pyntip mynta ka sngi da u Myntri Khynnah jong ka Sorkar Pdeng ba dei ban peit ia ka DoNER, ka PMO, Personnel, Public Grievances, Pensions, Atomic Energy bad Space, u Dr Jitendra Singh.
U Myntri khynnah ka sorkar pdeng u lah ong ba kadei ka burom jong ka Multi-Wavelength Space Observatory “AstroSat” ba nyngkong jong ka India kaba lah lap ia ka sharak kaba wan na ka galaxy kaba don 9.3 billion light year ka jingjngai na ka pyrthei. Ia kane ka galaxy kaba tip kum ka AUDFs01 lah lap da ki astronomer ba ialam da u Dr Kanak Saha na ka Inter-University Centre for Astronomy and Astrophysics (IUCAA) Pune.
Ia ka jinglong kyrpang jong kane ka jinglap ia kane ka galaxy lah ban sngewthuh lyngba ka jingmih khubor ha ka kot “Nature Astronomy” kaba pynmih na ri Bilat. Ka AstroSat/UVIT jong ka India ka la lah ban leh ia kane namar ka jingsawa jong ka UVIT detector ka kham duna ban ia kato kaba don ha ka Hubble Space Telescope jong ka NASA kaba don ha US.
U Dr Jitendra Singh u lah ai khublei ia ki riewstad space science jong ka India kiba lah pyni sa shisien ba ka India ka lah kiew ha ki kam ba iadei bad ka haw haw (space) ha kaba ki briew jong ngi mynta ki lah sdang ban ialam lynti ia kiwei ki riewstad science na kiwei kiwei ki ri. U Professor ShyamTandon, kane ka dei ka jingpynkup burom ia ka jingtrei shitom jong kito kiba lah ia don bynta bad ka UVIT lah palat 10 snem mynta.
U Director ka Inter-University Centre for Astronomy and Astrophysics (IUCAA), u Dr Somak Ray Chaudhury u lah ong ba kane ka jinglap ia kane ka galaxy ka pyni kumno ka ‘dark age’ jong ka universe ka kut bad kumno ka jingshai ka lah wan. “Ngi dei ban sngewthuh kumno kane ka lah jia hynrei ka long kaba eh bha ban lap ia ka tyllong ba nyngkong eh jong ka jingshai,” u lah ong.
Lah ban shu kdew hangne ba ia ka space observatory AstroSat kaba nyngkong eh jong ka India lah sdang da ka Indian Space Research Organization (ISRO) ha ka 28 tarik u Nailur, 2015 ha ka samoi ba nyngkong jong ka Sorkar Modi. Lah saindur ia ka da ka kynhun ba lah ialam da u ShyamTandon, u Emeritus Professor ba rim ka IUCAA ha ka jingkyrshan pura jong ka ISRO.
