Shillong, Nailar 26: Mynta ka sngi u myntri rangbah ka jylla u Cornad K Sangma u la khot ia ka jingialang jong ki Chief Executive Members jong ki lai tylli ki District Council ha kane ka jylla ban ia kren halor ka jingtyrwa ka sorkar pdeng ban wanrah ia ka jingpynkylla ia ka Sixth Schedule.
Haba kren ha ki lat pathai khubor ha dien ka jingialang u myntri rangbah u la ong ba, ka rai kaba kila shim ha kane ka jingialang ka long ban ai jingmut sha ka sorkar pdeng ban weng noh ia ka ktien “Unrepresented Tribes”
Haba ia dei bad ka jingmang ia ka jingdon ki MDCs ha ki iing dorbar thawain jong ki District Council la rai ba ka jingdon ki dkhot kim dei ban palat ia ka 40 ngut, 36 ngut dei ban shu jied da ka ilekshon bad saw ngut dei ban shu thung bad ar ngut dei ban long ki kynthei.
U Myntri rangbah u la batai shai ba ka shong ha ki District council ban shim ia ka rai katno ngut ki dkhot ki dei ban don tang ba kim dei ban palat ia ka 40 ngut, lada ki ADC ki kwah ban pynduna na kaba don mynta ruh kata ka shong ha ki lada ki kwah ban pynbunr uh ka shong ha ki ADC tang kam dei ban palat ia ka 40 ngut.
Ha kane ka jingialang la shim ia ka rai ban ai jingmut sha ka sorkar pdeng ban don ia ki “Village Council” ha Garo Hills katba ha Khasi bad Jaintia Hills kan long da ka kyrteng “Village Dorbar” bad ia ki nong kitkam dei ban jied lyngba ka ilekshon, kine ki long beit tang na ka bynta ki kam pynroi ha ki shnong.
U Myntri Rangbah ka jylla u la pynshai ba kane kan nym ktah ia ka riti dustur, ka rukom bat khyndew bashyiap ha ki shnong ki thaw katkum ki riti bala ioh pateng na u long shuwa man shuwa, kane ka jingai jimgut sha ka sorkar pdeng ban don ia ka Village Council ha Garo Hills Village Dorbar ha Khasi Hills kan long tang na ka bynta ki kam pynroi.
Haba ia dei bad ka ilekshon sha ki District Council bad kum juh sha ki Village Council bad Village Dorbar ka sorkar jylla kan sa thaw ia ka State Election Commission ban peit ia kane ka kam elelction ha ka jylla Meghalaya.
Ki District Council kin hap ban shna ia ki ain katkum ka para 2(a) bad para 3(g) bad kum juh kat kum ka para 12 (2) hapoh ka Sixth Schedule kumba la pynkup bor ia ki hapoh kitei ki kyndon.
Haba ia dei bad ki “ Municipal Council” kane ka jingialang kin ai jingmut sha ka sorkar pdeng ban nym pynpaw ia katei ka ktien hapoh kane ka jingthmu ban wahrah ia ka jingpynkylla khlem da pynpaw ia katei ka ktien.
Ha kane jingialang na ka liang jong ka KHADC la wan da u CEM u bah Titosstarwell Chyne, ba JHADC la wan ia shim bynta da u CEM u bah Thombor Shiwat bad na ka GHADC la wan shim bynta da u Deputy CEM Nikman Marak ha kane ka sngi la don lang ruh u Advocate Genenral jong ka jylla u Amit Kumar.
