Shillong, Naitung 06: U Lamphang ka iing dorbar thawain ka jylla Meghalaya u bah Metbah Lyngdoh u la leit ban ai khublei ia u myntri rangbah ba thymmai ka jylla Assam u Himnata Biswa Sarma ha ka sngi nyngkong.
Haba iathuh ha ki lat pathai khubor mynta ka sngi “ Nga la phone ia u Myntri Rangbah ka jylla Assam u Himanta bad nga la leit ban ai khublei ia u namar ba u la shimti kum u myntri rangbah ba thymmai ka jylla Assam” la ong u bah Metbah.
U bah Metbah u la ong ba kane ka jingleit jong u sha Assam ban ia kynduh ia u myntri rangbah ka jylla Assam ka long ban leit ia khublei ia u Himanta Bisawa Sarma ha dien ba u la shimti ia ka kam myntri rangbah ka jylla bad kane ka jingleit ka long kum u Lamphang ka iing dorbar.
La iathuh ba ha pdeng ka jingiadih sha u Myntri Rangbah ka jylla Assam u la pynpaw ba u kwah ban ia pynbeit noh ia kane ka kam pud kam sam ha pdeng ka jylla Meghalaya bad ka jylla Assam kaba la sah teng mynta la bun bun phew snem.
Ha kane ka jingiakren na ka liang jong u bah Metbah u la pynpaw ba ha kane ka jingiapynbeit dei ban shim lang ia baroh kiba don bynta lang ha kane ka kam ha kaba ia pynbeit ia kane ka kam pud kam sam hapdeng kine ki ar tylli ki jylla.
“ Ia kane ka kam pud ym dei ban ialehkai politic, to ngin ia wat ki lat ki lynti kumno ban lah ban ia pynbeit ia kane ka jingeh kaba la sah teng mynta la bun bun snem na ka bynta ka jingbha jong ka jylla” la ong u bah Metbah.
