Shillong, Lber 19: Na ka liang jongka seng KSU Bengaluru unit Ka la ioh ban leit jngoh bad leit ai mynsiem Ia ki khynnah khasi kiba laioh kem pang na ka jingbam kaba la sah, bad kala ioh ruh ban ai ka jingiarap iakitei ki khynnah kiba donkam hakum kane ka jingjia ba sngewsih.
Ha kine ki sngi baladep, ka jylla Karnataka ka la mad ia ka jingjia ba sngewsih ha kaba ki khynnah pule na ka skul Gokula Vidya Samsthe ha Malavalli, Mandya district, ki la ioh pang hadien ba ki la bam ia ka jingbam kaba la sah.
Kane ka la wanrah ia ka jingduh noh ia arngut ki mynsiem jongki khynnah pule na Meghalaya, kiba la tip kyrteng kum u Kherlang Khongtani na ka shnong Lyndem bad U Name Bantei Marwei na Ka shnong Lawse.
Ha katei ka jingjia la don kumba 120 ngut ki briew ki la ioh pang hadien ba ki la bam ia ka jingbam kaba la pynkhreh ha kawei ka hotel ha Malavalli. Kine ki kynthup ia 40 ngut ki khynnah skul jong ka Gokula Vidya Samsthe, ha kaba 24 ngut ki khynnah skul ki dei na Meghalaya.
Na baroh kine kiba pang, ar ngut ki la khlad noh, katba kiwei ki dangdon haka jaka sumar ha Mandya Institute of Medical Sciences,bad Lai ngut naki ki dang shah sumar ha poh ICU bad kiwei pat ki la kham khlain.
Ki dkhot jong ka KSU Bangalore Unit man ka sngi ki leit ban jngoh ia ki khynnah Khasi ba thiah pang. Ha ka jingiasyllok bad ki doctor ka hospital, ki dkhot ki KSU ki la ioh jingtip ba ym pat long ban ai kino kino ki jingbam ia kine ki khynnah hynrei tang ka um coconut.
Ki dkhot ka seng ki la shem ba ym shym don ba pynbiang ka um coconut ia kine ki nongpang, bad kumta bran bran ki la mareh ban thied ia ki coconut bad ai ka um snepkor ia baroh ki khynnah Khasi ba thiah pang, kane ka long katkum ka kyrwoh kaba la phah da u samla Donboklang Nongphud President KSU Bengaluru Unit.
