Shillong, Nohprah 22: U bah Latiplang Kharkongor MDC jong ka Nongthymmai mynta ka sngi u la leit jngoh ia ka Holy Child Mercy Home kaba don ha Demthring kum shibynta ban ia don lang bad ki ha kane ka lehkmen Khristmas da kaba kner iala ki jong ki kti ban ai jingiarap ia ki.
Ha kane ka jaka ri ia ki tynmen ki kro baroh ki don 32 ngut ia kaba la peit da ki sister jong ka Balang Katholik. Ha ka jingkren jong u bah Latiplang, u la ai ka jingiaroh ia ki sister kiba la shim ia kane ka kam ba ratbah ban ri ban sumar ia kiba la tynmen haka rata ki bym don shuh ba peit ba sumar ia ki.
Na ka liang jong ka sister Natalia kaba peit ba sumar ia ki, kala pynpaw ia ka jingsngewnguh ia u MDC jong ka Nongthymmai u ba la wan ban jngoh ia ki bad kum juh ia kiba la ia wan lang ha kane ka sngi. Ha kane ka sngi kala ruh ka jingiaduwai bad ia rwai lang ban pynkreh iaka jingwan jong u trai jisu ha ka sngi Khristmas.
