Shillong, Nailur 10: U Lat jong ka jylla Meghalaya u Satya Pal Malik mynta ka sngi ha ka sien kaba nyngkong u la leit ban jngoh ia ka Ramakrishna Mission bad ia iing mane Cathedral kiba don ha Laitumkhrah.
Ha kane ka jingleit jong u Lat ka jylla ha Ramakrishna Mission, Laitumkhrah, u la ia kren bad u Swami Hitakamananda, Secretary RKM, Laitumkhrah bad u la pynlong ia ka jingleh burom ia u Swami Vivekananda bad Sri Ramakrishna Paramahamsa.Ha kane ka jingleit la ia kren ruh ka ki kam ba kane ka jaka kala ai ka jingshakri sha ki paidbah.
Ha kane ka sngi u lat jong ka jylla u la leit ban jngoh ruh ia ka ing mane bah kaba don ha Laitumkhrah kaba la tip kum ka Cathedral Church, Laitumkhrah, na ka daw jong ka COVID-19 bad ki jingadong namar ka jingkhang ia ki jaka mane blei um shym la rung hapoh iing mane.
Ha kane ka jingleit jngoh u la ia kynduh ia u Phadar Pascal Lyngdoh ha kaba u la batai halor kane ka iing mane bad ha ka juh ka por la pynlong ruh ia ka jingduwai na ka bynta ka jingkoit jingkhih u Lat ka jylla bad na ka bynta ka jylla hi baroh kawei.
