Shillong, Nailur 11: Kum shibynta ka jingpynkhreh ïa ka 3rd Sohra International Half Marathon ka ban long ha ka 21 tarik u Nailur 2024 ka la ïaid shakhmat bad mynta ka 11 tarik u Nailur 2024 ki bor pynïaid ki la ïoh ban leit jurip ia kane kine ki jaka kata naduh Laitsohpliah ka lynti ban sdang ka jingmareh haduh Mawsmai ka jaka ban pynkut.
Ha kane ka jinleit jurip la ïadonryngkat da u Bah John Kharshïing Working President ka MSOA, Bah Finely Pariat – General Secratary ka MSOA, Bah P B War Nongbri, K.Passah Asst director jong ka tnat Sports and Youth Affairs, ki officer na ka tnat PWD, ki officers na ka tnad ka koit ka khiah bad na ka tnat pulit, na ka ophis treikam ka SDO bad kiwei dei ki dkhot jong ka Organising committee kiba ia don bynta ha ka jingpynkhreh ïa ka ka Sohra International Half Marathon.
Na ka liang ki bor pyniaid ki la ioh ruh ban pynlong ia ka jingïalang ha ka Ophis treikam ka SDO ka Sohra ban ïatai halor ka jingïaid shakhmat ki kam bad la rai ruh ban pynlong biang ïa ka jingleit jurip ha ka taïew ban wan.
Kane ka long ruh ka jingpynbna ba ïa ki Tshirt na bynta ka Run for Fun yn sam naduh ka 18 tarik mynta u Nailur naduh ka por 12 baje mynsngi haduh 5 baje nohphaisngi na bynta kito ba la thep kyrteng lyngba ka online. Na ka liang jong ka synjuk ka la kyrpad ruh ïa kino kino kiba thmu ban wan shim ïa ki Tshirt ba kin rah pynshisha ryngkat ka ID.
