Shillong,Lber 26:U nongialam ka liang pyrshah ha ka ing dorbar thawain ka jylla u Dr mukul Sangma u la leit ban jurip ia ka Govt Medical College Tura kaba dang shna mynta ha West Garo Hills District.
Haba kren ha ki lad pathai khubor hadien bala dep ban jurip la ong ba kane ka jaka pule doctor ka dei kaba la bei pisa da ka sorkar pdeng bad dei ha ka jinglong myntri rangbah jong u la buh ia u maw nongrim ban shna ia kane ka jaka pule doctor.
U nongialam ka liang pyrshah u la ong ba u sngewkmen bala jied ia kitei ki jaka ban shna ia ka Medical College namar kawei na ki kyndon kaba ka sorkar pdeng kala buh ka long ban pyndonkam ia ki hospital bala don lypa ba kin long kum ki jaka hikai ia ki jaka pule doctor bad dei halor ka jingdon jong ka hospital ba ka sorkar India kala ai ia kane ka Medical College.
Ka jylla Meghalaya ka long kaba donbok ban ioh ia kane ka skhim ban shna ia ka jaka pule doctor,hynrei ka long kaba sngewsih ba ka jingtrei kala slem bad kane ka jingwan ka long ban pyntikna ba ka jingtrei kan long kaba iaid beit khlem da pynslem shuh bad kwah ban iohi ba kane ka jaka pule doctor kan dep ha ka por kaba biang.
U nongialam ka liang pyrshah u la pynkynmaw ba ha kane ka dorbar ba dang shu dep u la wanrah ia ka mat jingiakren bad ka sorkar ruh la pyntikna ba kin pyndep ia kane ka jingtei ka jaka pule doctor,dei halor kane u Dr Mukul u la ong ba u bud dien ia kane ka kam ban iohi ba ka jingtrei ka dei ban dep ha ka por kaba la buh,u la ong ba ka jingtrei ka iahap kumba la jubab ha ka iing dorbar.
