Shillong, Nailar 12: Ka seng nongrep Hill Farmers Union (HFU), ka la pynpaw ia ka jingsngewdiaw bad kumjuh ruh ka jingsngew lyngngoh halor ka jingbym pynmih jong ka tnad ka rep ka riang jong ka sorkar jylla ia ka jingpynbna (notification) ba la pynbna ia u snem 2020 kum u snem jong ki nongrep.
Ha ka shithi ba la phah sha u Chief Minister bad kumjuh ruh sha u Myntri ka tnad ka rep ka riang ryngkat ka jingphah jingpyntip sha u Principal secretary jong ka tnad ka rep ka riang ka Union ka la dawa ba ka tnad ka rep ka riang kan pynmih mordor ia ka notification ryngkat ka jingmang pisa kaba kyrpang ban iarap ia ki nongrep namar ki nongrep ki iakynduh shibun ki jingeh namar ka jingshah ktah ha ka jingpang khlam covid-19.
Shuh shuh ka seng ka la pynpaw ba hadien ka jingkren jong u Myntri Rangbah ha ka jingialang jong ka 2nd Farmers parliament ha Tura bad kumjuh ruh ha ka sngi Republic ba mynta u snem 2020 un dei u snem jong ki nongrep, ki nongrep ki la pynpaw ka jingsngew kmen ryngkat ka jingkhmih lynti ban ioh ia ki jingiarap khamtam ha kum kane ka por ba ki nongrep ki iakynduh jingeh.
kumta ka seng ka la dawa ba dei ban pynmih mardor ia ka jingpynbna ryngkat ka mang pisa kaba kyrpang khnang ba kan long ka jingiarap ia ki nongrep. Haba iakren bad u President jong ka HFU u bah Commande Shangpliang u la ong ba ka sorkar kam dei ban khein beij than ia ki nongrep, hynrei ka dei ban pynmih mardor ia ka official notification, hynrei kane ka jingpynbna snem jong u snem kan shu long tang ha lyer.
U la ong ruh ba ka seng kan nym ailad ia ka sorkar ban shu pynbiej ia ki nongrep da kaba shu kren tang da ka ktien, hynrei ka dei ban pyni bad leh da ka kam. U la pynpaw ia ka jingsngewkhia namar ka seng ha u bnai Lber ruh ka la dep phah ia ka shithi jingpynkynmaw sha ka sorkar ba kan pynmih ia ka jingpynbna.
Na ka liang jong seng ka sngew lyngngoh ba haduh mynta ym shym pat lah ban pynmih bad la kut sa u snem 2020. Kumta u la dawa ba ka sorkar ka dei ban pynbna ruh ia u snem 2021 kum u snem ki nongrep ryngkat ki skhim kiba thymmai khnang ba kan long ka jingiarap ia ki nongrep jong ka jylla hi baroh kawei.
