Shillong. Jymmang 01: Ka seng Hynñiewtrep Integrated Teritorial Organization (HITO) ka la maham ia ka seng ba la tip kum ka Achik Concious Holistically Integrated Teritorial Krima (ACHIK) ba kam dei satia ban ialam bakla ia ki paidbah nongshong shnong jong ka jylla haba iadei bad ka rukom treikam jong ka Roster system.
Haba kren sha ki lad pathai khubor ha Shillong Press Club, u president ka seng HITO, u bah Donbok Dkharu u la ong ba ka jingphah shithi jong kane ka seng ACHIK sha ka tnad pynroisor ban pynsahngeh noh shi syndon ia kito ki briew ki bym dei na ki jaitbynriew Garo, ha kaba u ne u nongialam jong ka seng u la ong ba ka seng ACHIK ka sdang ban aiding bad ialam bakla ia ki paidbah.
Haba iadei bad ka jing kam jong ka seng ACHIK ba ki 13 tylli ki kam balait ha katei ka ophis la mang beit tang ia ki Garo,u bah Dkhar u la ong ba ka long ka ba bakla bad kaba ymlah ban long namar ba ki kam ba lait hi ka long tang artylli.
Haba ia dei bad ka shithi ba la thoh da ka seng ACHIK ka ialam bakla bad ka long kaba ialam bakla bad ka ban wanrah pynban ia ka jingia sngewpher jaitbynriew hapdeng ki jait bynriew Khasi bad Garo, la ong u President ka seng HITO bah Donbok Dkhar.
U bah Donbok u la iathuh ruh ba katkum ka jingwad jingtip jong ka seng la ong ba don kumba 19 tylli ki kam ba la sah thylli naduh u snem 2019, ha kaba 16 tylli na kitei ki 19 la dep ban thung, ha kaba 10 tylli ki kam la thung ia u Khasi-Jaiñtia bad saw tylli pat ia u Garo, ha kaba sa artylli ki kam ki ba dang lait ruh la mang na bynta jong ki Garo, ha kaba ka jinglait jong kine ki kam ruh ka dei ba don kiba la shongthait noh na ka kam.
Ka HITO, ka la ong ba ka seng ACHIK ka dei ban da wad shwa ka jingtip kaba bniah katkum ki kyndon aiñ ha shwa ba kan kren, ymdei ban shu aiding, kumjuh ka seng la buh ruh ka jingkyntu ia ki bor sorkar ba ki dei ban peit bniah bha ia kine ki kynhun namar ki dei kiba ialam bakla ia ki paidbah.
