Shillong Jymmang 14: Ka jingaiti jong ka sorkar ia ki 56 tylli ki 33/11 KV sub-stations kiba hap hapoh ka jingpeit jong ka Meghalaya Power Distribution Corporation Limited (MePDCL) sha ka kompeni ba nabar, ka M/s Broadcasting Engineering Consultants India Limited (BECIL) ka long ka jingkhein dew thala ia ka jingud jingnam bad jingujor ki paidbah kynthup ia ki nongtrei ka MeECL bad ki sengbhalang.
Kane ka jingiaid shakhmat jong ka sorkar lyngba ka tnad bor ding ka pyni ia ka jingbym khein snep ia ka sur jong u paidbah wat hadien ki jingpyrshah na kiba bun ki liang kynthup ia ki sengbhalang.
Ha ka 7 tarik u jymmang 2021, ka KSU, FKJGP, HNYF bad ka RBYF ki la phah mardor na ka shithi sha u myntri rangbah ka jylla Meghalaya, u Conrad K. Sangma ban pyni ia ki jingpyrshah ia kiba bun jong ki rai bad jingthmu ka tnad bording ha kaba ia dei bad ka rukom treikam ka MeECL.
Kawei napdeng ki 8 tylli ki mat ba la pynsngew sha ka sorkar ka dei halor ka jingthmu ban lilam ia kitei ki sub-stations sha ka kompeni kaba nabar ka ban ktah jur bha ia ka ioh ka kot ka jylla ha kaba ka sorkar kan hap ban siew haduh 3,75,000 tyngka man u bnai sha katei ka kompeni.
Shuh shuh ka jingaiti ia kitei ki sub-stations sha katei ka kompeni kan pynduh kam ia kiba bun ki samla pule ka jylla khamtam kito kiba la pass ha ka lain kaba iadei bad ka bording kynthup ruh ia kito kiba la pyndep ia ki jingpule ki jong ki ha ki 3 tylli ki Polytechnic Institutes ka jylla.
Ia katei ka shithi la phah lyngba ka email sha u myntri rangbah ban ki saw seng kim shym la wad ka lad ban ia kynduh mar khmat namar ka jinglynshop palat ka khlam COVID-19 kaba la ktah jur ia ka jingim bad ka kamai kajih ki paidbah hynrei ka ngeit skhem ba u myntri rangbah un shah shkor lem ia ki jingujor ki sengbhalang.
Ki saw seng ki khmih lynti ba u Myntri rangbah un wad ki lad ki lynti ban pynbeit ia kitei ki jingeh kiba long ki jingma ia ka tnad bording ha ki sngi ban wan. Ia katei ka shithi la ai kopi ruh sha baroh ki cabinet ministers bad ia kynhun sain hima baroh.
Pynban phewse, ka sorkar ka la leh mutlop bad kumba pynmong shuh shuh ka la phah beit beit ia ka Letter of Award (LoA) sha katei ka kompeni ban sdang noh ka jingshimti ia kitei ki 56 tylli ki sub-stations ka MePDCL. Kane ka jingleh jong ka sorkar bad ka jingsngap kuman jong ki myntri bad ki seng sain hima ka pyni ia ka jingbym khein snep ia ki paidbah bad ia ki sengbhalang bad pyni ruh ba ka sorkar ka thrang hir hir ban pynriewspah ia katei ka kompeni khlem da khein snep shuh ia ka jingkyrduh bording ka jylla, kynnoh ki saw seng.
Ka KSU, FKJGP, HNYF bad RBYF halor kane ka phang ka pynpaw ia ka jingbitar shla ia ka sorkar kaba la shim kabu khnang ban leh kitei ki kam pyrshah ia u paidbah namar ka jingdon jong ka lockdown kaba pyrkhing ia ka iaid ka ieng ban lait na ka jingpur u khniang corona.
Kane ka jingshim kabu jong ka sorkar ka pynpaw ia ka jingarsap bad sianti ka sorkar namar ba ka sngewthuh shai ba ki sengbhalang kin ym lah ban pynlong ki jingiakhih hapdeng kane ka khlam. Hynrei ka sorkar ka dei ban kynmaw ba kane ka khlam kan ym neh shijunom bad kane ka jingshim kabu ka jong ka kan kyrtoh kylla ia ka.
Ki paidbah baroh ki ia snoh kti lang bad kohnguh sneng ia ki kyndon ka sorkar hynrei ka sorkar pat ka shet kylla plak da kaba iaid lait ia u paidbah ha ki mat kiba ia dei bad ka MeECL. Ki 4 seng ruh ia mynta kin ym pynlong kine ki jingiakhih, hynrei tang mar ia kut kane ka khlam, ka sorkar kan hap ban mad ia ki jingiakhih kiba tyngeh lymda ka weng ia katei ka LoA.
Shuh shuh ki 4 seng ki maham ia ka BECIL ba kam bit ban shimti ia kitei ki 56 tylli ki sub-stations khlem da ioh ka jingbit na u paidbah ka jylla bad lada jia eiei ia ki, kin hap bah khlieh hi. ki 4 seng ki ia wer ia ki paidbah ka Bri U Hynniewtrep ban kyrshan bad snoh kti lem bad ki seng ha kane ka jingleh kynrad donbor jong ka sorkar ka ban pyniap ia u duk u suk khamtam ha ka liang ka bording bad ka ioh kam iohjam.
Kane ka long kay kum ka kyrwoh ba la soi da ki nongislam kitei ki saw tylli ki seng, U samla Lambok Starwell Marngar President Khasi Students’ Union bah Wellbirth Rani President Federation of the Khasi Jaintia & Garo People, bah Sadon Blah HNYF bad President ka RBYF.
