Shillong, Jylliew 18: U bah Paul Lyngdoh myntri ka tnad jngohkai pyrthei, u la iathuh ba ka sorkar jylla ka la mang T 7.03 klur ban pynitynnad shuh shuh ia ka Nan Polok (Ward’s Lake) kaba don hapdeng ka Nongbah Shillong, da kaba sdang da ka jingpynkhuid nyngkong ia ka um kaba don ha kane ka pung.
Haba kren sha ki ladpathai khubor u bah Paul Lyngdoh u la ong ba ïa kane ka rai la shim na ka bynta ban khring shuh shuh ia ki nongwan shangkai pyrthei hapoh ka jylla.
Haba kren sha ki nongthoh khubor, u bah Paul u la ïathuh ba lyngba ka tnat Urban Affairs ka Sorkar ka la mang T.7.03 klur na ka bynta ban pynitynnad ia ka Nan Polok kynthup ka jingpynkhuid ia ka um ba don ha ka pung.
“Ka tnat ka la dep khot tender ban pynkhuid ia ka um kaba don ha ka pung bad ki kam kin sdang ha ki 2-3 taiew ban wan, ha kaba ia ka pung yn pynkhuid da ka teknologi ‘Nano Bubbles’ hadien ba la pynkhuid ia ka um ba don ha ka pung, ka um kan long kaba khuid bha” u la ong.
Nalor kane u bah Paul u la pyntip ruh ba tang shu kut ka aiom slap kin sa lah ruh ban sdang noh sa ia ka ‘Light and Sound Show’ ha Nan polok ia kaba la mang kumba T.4 klur ban pyntrei.
U bah Paul u la iathuh ba ka jingkhot tender na ka bynta kane ka kam ruh kan sa sdang noh shen bad ïa kane ka Project yn pyndep hapoh 6-8 bnai, ka tnat ka la pynkhreh ruh ban phah shna ia ki jaka leit bar kiba paka na ka bynta ki paidbah kumjuh na ka bynta ki nongwan jngohkai pyrthei ha ki 10 -12 tylli ki jaka ba la jied.
“Ka tnat ka la mang mar T.25 lak ban shna ia ki jaka leit shabar ha ki 10-12 tylli ki jaka kum ha Umiam Lake, Nan Polok, Sohra, Dawki bad kiwei kiwei de” u la ong.
