Mynjur ka ka Sorkar Pdeng ban bteng sa ar snem ia ka skhim “Fast Track Special Court”

New Delhi, August 4: Ka kynhun ki Myntri Sorkar Pdeng ba ialam da u Myntri Rangbah Duh ka ri, u Narendra Modi ka la ai jingmynjur ban bteng ia 1023 tylli ki Fast Track Special Court (FTSC) kaba kynthup 389 tylli ki court kiba peit kyrpang ia ki case POCSO hapoh ka skhim ba bei tyngka da ka Sorkar Pdeng naduh ka 01.04.2021 haduh 31.03.2023.

Habad ia dei bad kane  ka jingmang tyngka ka long T. 1572.86 klur (T.971.70 klur ka long ka bynta jong ka Sorkar Pdeng bad T.601.16 klur ka long ka bynta jong ka jylla). Ia ka bynta jong ka Sorkar Pdeng yn bei na ka Nirbhaya Fund. Ia kane ka skhim la sdang ha ka 02.10.2019.

Ka Sorkar ka peit bniah bha ia ka jingshngain jong ki longkmie bad ki khynnah. Ban pynkupbor ia ki khynnah kynthei, ka Sorkar ka la sdang shibun ki prokram kum ka ‘Beti Bachao Beti Padhao’ ha ryngkat kiwei kiwei.

Ka jingshah bat bor ki khynnah kynthei kiba hapoh 12 snem ka rta bad ki khynnah samla ba hapoh ka 16 snem ka la pynkyndit ia ka ri baroh kawei. Kine ki jingjia bad ki jingbishar ba shim por ka la wanrah ia ka jingdonkam ban seng ia ka rukom treikam kyrpang jong ka iing shari ka ban pynstet ia ka jingbishar bad ai jingiarap mardor ia kito ki lanot kiba mad ia ki jingshah lehbeijot.

Ban wanrah ia ki kyndon ba kham pyrkhing bad ban pynstet ia ki kam ai jingbishar ha kum kine ki case, ka Sorkar Pdeng ka la wanrah ia ka ‘The Criminal Law (Amendment) Act, 2018’ ha kaba la buh kyndon ban ai jingpynshitom kaba tyngeh kaba kynthup ka jingrai pyniap ia kito kiba batbor. Kane ka la ialam sha ka jingseng jong ki Fast Track Special Court (FTSC).

Ki Fast Track Special Court ki dei ki iingshari ba kyrpang kiba dei ban pyndep stet ia ka jingai jingbishar. Ki trei kham stet ban ia kiwei kiwei ki iingshari bad ki pynlong ia ki jingbishar kiba stet. Ha ryngkat ka jingai jingiarap kaba stet ia kito kiba mad ia kum kine ki jingjia shah leh beijot, ki pynkhlain ruh ia ki jingtehlakam ia kito kiba ju mlien ban leh ia kum kine ki kam beain.

Kane mynta ka treikam ha 28 tylli ki jylla bad la ai jingmut ban pyniar ia ka ban treikam ha 31 tylli ki jylla kiba don lad ban iasnoh kti bad kane ka skhim. Ka kyrshan ruh ia ki sienjam jong ki Sorkar Jylla bad ki UT ban ai ka jingbishar kaba stet ia kito kiba mad ia kum kine ki kam beain ha ka ri kaba kynthup ruh ia ki jaka kyndong kynshrot. Ki jingthmu jong kane ka skhim ki long:

Ban kyntiew ia ka jingkut jingmut jong ka ri ban ieng na ka bynta ka jingshngain jong ki longkmie bad ki khynnah kynthei. Ban pynduna ia ki case ba sahteng kiba iadei bad ka jingshah batbor bad ka POCSO Act.

Ai jingbishar kaba stet ia kito kiba mad ia kum kine ki kam beain bad ban tehlakam ia kito kiba ju mlien ban leh ia kum kine ki kam. Ka jingpyndep stet ia kine ki case kan pynsting ia ka jingsahteng ki mukotduma.

 

What Next?

Recent Articles

Leave a Reply

Submit Comment

*

Where to buy Vidalista Professional 20 Mg (Tadalafil) tablet