Shillong, Nailar 21: Mynta ka sngi kala don ka jingjia kaba sngewsih ha kaba wei u briew ba la tip kyrteng kum u Dinesh Nonglang 37 snem u la khlad na ka daw jong ka jingpom pyrthad bad kiwei pat kila mynsaw ha kane ka jingjia kaba sngewsih.
Katkum ki jingtip kiba la ioh mynta ka sngi ba ha ka por kumba 3.45 baje jan miet lai ngut ki briew kila kyllon ha madan ha dein ka jingpom pyrthad, ia kine lai ngut la pynkit noh sha Civil Hospital Shillong bad u wei na ki ba la tip kyrteng kum u bah u Dinesh Nonglang 37 snem na Mawlai Umjaiur khlad noh ha lynti shuwa ban poi sha Civil Hospital Shillong.
Katkum ka jingtip kaba la ioh la ong ba ki lai ngut ki dei shiparalok kila ia lehkai kynjat ball ha katei ka madan Golflink bad ha dein bala sdang hap jur u slap kila iarieh ha wei trai dingkseh bad ka leilih kala thaba kynsan bad kine ki lai ngut kila thlep jar bad tied sa u pyrthad.
Ki ar ngut kiba mynsaw la sumar ha Civil Hospital Shillong. Karnes Nonglang 25 snem na Mawkyrwat ba shong ba sah ha Lumshyiap bad u Shalbines Lyngdoh Marshilong 32 snem ka rta ba shong ba sah ha Mawlai kynton Massar.
