Shillong, Naitung 11: U Myntri ka tnad ka koit ka khiah u Bah AL Hek mynta ka sngi u la pyntip ba baroh kiba la test COVID-19 Positive mynta ka sngi ki long 47 ngut, na kine 30 ngut ki dei ki shipai BSF bad 17 ngut ki dei ki riew paidbah.
Haduh mynta ka sngi baroh kiba la test COVID-19 Positive ha ka jylla ki long 236 ngut. Haba ai ia ka jingkhein, la ong ba tang ki shipai BSF ki long 159 ngut, 2 ngut ki shipai Air Force, Ri Bhoi District 20 ngut, West Garo Hills 9 ngut, East Jiantia Hills 2 ngut bad East Khasi Hills 44 ngut.
La aithuh ba la shim nongmuna haduh mynta ka sngi ki long 23454 ngut, kiba la test Negative ki long 22902 ngut bad kiba dang ap ia ka resolt ki long 290 ngut, kiba la wan phai sha ka jylla haduh mynta ka sngi ki long 21496 ngut.
Haba ia dei bad ka jingong ban test naphang ia ki briew ha ki lai tylli ki shnong, Mawpat, Rynjah, Nongmynsong bad Umpling la iathuh ba ia ka jingialang la pynlong mynne ka sngi bad ki dorbar shnong bad ia ka test kan sa sdang ha ka sngi Balang jong kataiew ban wan.
