Shillong, Nailur 05: U Shongknor jong ka iing dorbar thawain ka jylla u Dr Donkupar Roy mynta ka sngi u la pynbam smai ia u Conrad K Sangma kum u MLA jong ka 51-South Tura Konstitwensi ha ka jingia don lang ki dkhot jong ka liang synshar bad kum juh jong ka liang pyrshah.
Na ka liang synshar na ka sorkar MDA kiba la ia don lang ki long u Bah Banteidor Lyngdoh jong ka PDF, u Bah Metbah Lyngdoh na ka UDP, u Deputy Speaker ka iing dorbar u Timothy D Shira, u Bah Lahkmen Rymbui, u myntri synbut rangbah u Bah Prestone Tynsong bad bun ki nongialam na baroh ki seng sain pyrthei na ka kynhun MDA.
Na ka liang pyrshah u ba la wan ban sakhi ia kane ka sngi kaba u myntri rangbah ka jylla ha ka sien kaba nyngkong eh ha ka jylla ba um bam smai kum u MLA u ba la wan ia sakhi lang u dei u Bah Process T Sawkmie na ka seng Congress.
Haba kren ha ki nongthoh khubor ha dien ba la dep ban pynsmai, u Conrad u la pynpaw ia ka jingai khublei kaba kyrpang ia ki paidbah jong ka 51-South Tura kiba la ai ka jingshaniah ha u bad ia baroh kiba la trei shitom na ka bynta jong u ha kane ka elekshon shiteng samoi ban pynjop ia u.
U la ong ba kum u myntri rangbah ha kine ki hynriew bnai kiba la leit noh bay m pat long u MLA bad mynta kum u myntri rangbah ba la long MLA, u la ong ba ka thong ka jong u ka long ban ai ka jingshakri na ka bynta ka jylla ryngkat ka jingiatrei lang jong baroh ki dkhot kiba don ha ka sorkar MDA.
U Myntri rangbah u Conrad K Sangma la kubur ban pyniaid ia ka sorkar kaba ia khleh khawlang kam dei kaba suk, hynrei ha kane ka sorkar MDA kaba la ialam da ka NPP ha kaba u long u myntri rangbah, ka don ka jingiasngewthuh jingmut lang baroh wat na kito ki seng sain pyrthei kiba don tang u wei u MLA ruh, haba ka sorkar ka shim ia kano kano ka rai na ka bynta ka bha ka miat jong ka jylla.
