Shillong, Rymphang 07: Mynta ka sngi u Dr Mukul Sangma nongialam ka TMC u la leit ban thep kyrteng ban ia khun ia kane ka Elekshon MLA na Tikrikilla Konstitwensi bad ha ka sngi nyngkong u la dep ban thep kyrteng na Songsak.
Ha kane ka elekshon MLA kaba mynta ka ban long ha ka 27/2/2023 mynta u bnai dei tang u Dr Mukul Sangma ba ia khun na ki ar tylli ki konstitwensi, ha ka snem 2018 ruh u la ia khun na Ampati bad na Songsak bad mynta un ia khun na Songsak bad Tikrikilla.
Ki kyrtong jong ka AITC kiba la thep kyrteng mynta ka sngi ki long u Joannes Jefferson Tyler Lamphrang Lamare na Nongkrem bad u Tengsim G Momin na Ranikor. Ka AITIC kala dep banpynbna ia ki kyrtong na baroh 60 tylli ki konstitwensi bad kiba la kloi ban ia khun ki long 59 ngut.