Shillong, Naitung 20: Mynta ka sngi ki don 200 ngut ki samla pule ka Ri India kila wan phet na Bangladesh bad poi sha Sonamura District jong ka jylla Tripura, na kine 39 ngut ki dei ki samla pule na ka jylla Meghalaya.
Ki bor sorkar jong ka jylla Meghalaya kila ia kren bad ki bor sorkar jylla ka jylla Tripura ban pynthikna ba ki samla pule kin poi suk sha ka jylla, ha ka juh ka por ka sorkar Meghalaya ka dang ia kren bad ka Indian Embassy ha Bangladesh ban ioh ban pynlait ia ki samla pule kiba dang sah kut ha Bangladesh.
U Deputy Commissioner bad u Superintendent ki pulit jong ka Sonamura kila pynbiang ia ki jngbam na ka bynta ki smala kiba wan phai na Bangladesh, ia kine ki samla pule la wan kit da ki ar tylli ki Bus bad ia ka bam ka dih la pynbiang da u Deputy Commissioner ka East Jiantia Hills District, Khliehriat.
Ka sorkar Meghalaya kala shim ia baroh ki lat ki lynti ban pynthikna ba ki samla pule kin ioh ban wan phai da kaba suk ba sain sha la ka jong ka jylla, la buh ruh ia ki ophisar ba kin pynthikna ia ka jingsuk ki samla pule kiba wan phai.
