Shillong, Naiwieng 03: Ki pulit jong ka East Garo Hills kila pyntip lyngba ka Twitter ba ha dien ka jingbud dien kila ioh ban kem ia kawei ka kynthei kaba dei na Nagaland bad ia u wei u briew ba dei na ka Ri Nigeria kiba la don kti ha ki kam thoh ha Williamnagar.
Ki Pulit jong ka East Garo Hills kila ioh ia ka jingujor ba la don ka jingshah thok ha ki briew, halor kane ka jingujor ki pulit jong ka Williamnagar kila pynlong ia ka jingtohkit bad ha dien ba la bud dien bha la ioh ban kem ia kitei ki briew na Delhi bad la shem ba kine ki briew kiba la shah kynnoh wei dei ka kynthei na Nagaland bad u shyrnang na Nigeria.
Lyngba ka twitter ki pulit kila pyntip ba na kitei ki ar ngut la ioh ban kurup 12 tylli ki tiar mobile, 23 tylli ki ATM kard, 12 tylli ki pass book jong ki bank bapher bapher la ioh ban kurup na ki bad la suba jur ba kine ki briew ki lah ban don kti ruh ha ki kam shukor ia kiwei ruh.
Ka jingioh kem ki pulit ka East Garo Hills ia kitei ki briew ka long ryngkat ka jingiatreilang bad ki pulit jong ka nongbah Delhi, na ka liang jong ki pulit ka East Garo Hills shen kin sa wan lam ia kitei ki briew sha Williamnagar ban bteng ia ka jigntohkit pyrshah ia kitei ki briew.
