Shillong, Nailar 09: Na ki saw ngut ki khar Bangla kiba la ioh kem mynta ka sngi na wei na khlaw Khonjoy bad 3 ngut na khlaw ha Chibak la shem ba u wei na pdeng kiba la shah kem dei u pulit langrud ka ri Bangladesh.
Na ka ID Kard kaba la ioh ban kurup u wei na pdeng kisaw ngut u kyrteng u Marufur Rahman u dei u pulit ka ri Bangladesh u dei kum u pulit langrud bad ka ID No. BP911139470, sngi kha 01/Jan/1992 bad ka snam ka dei 0+.
Kumba ka paw na kane ka ID kard ba soi ia ka dei AIG (PIMS), la thoh sha dien kane ka ID kard ba dei dkhot ka kynhun pulit ka Ri Bangladesh bad kiwei kiwei ki kyndon ruh kila thohlang bad lada don ba lap ia kane ka kard dei ban phone ha une u number 55101677.Na kine ki saw ngut la ioh ruh ban kurup ka pisa Taka kaba dei jong ka Bangladesh, ka pisa India.
Katkum ka jingiathuh ki briew na katei ka thain la ong ba kine ki nonglut kiba don ha pdeng 8 bad 10 ngut kila sdang ia ka jinglute na ka shnong Rongdangai ha ka por 12.30 baje ei ei mynstep bad haba ki poi ha iing jong ka Lakme A Marak bad kila siat pynsiem sha suin bad shah ia u Balsrang A Marak haduh ban da mynsawjur.
