Shillong, Naitung 02: Ha kine ki sngi ki long iing kiba hap hapoh ka BPL hapoh ka thain Mawhati kila ioh ia ka bill light na ka MePDCL bad kaei kaba la pynkyndit ia ki ka long ba ka jingkiew ka bai light ka long na ka T.250 tyngka shibnai sha ka T.6000 tyngka.
Haba iathuh ha u SP News Agency, na ka thain Mawhati kila ong ba baroh shikatta kine ki long iing BPL ki siew ia ka bai light T.250 tyngka shibnai namar ba kim don TV, ne shet ja da ka light bad naduh ba don kane ka jingpakhang ha kine ki lai bnai kim shym ioh ia ka bill light bad haba ki ioh mynta ki kyndit ban iohi ba kala kiew sha ka T.6000/- tyngka.
Haba ia dei bad kane ka jingkiew syndet kin sa pyntip sha u MLA bad u MDC jong ki ba kin ia kren lem bad ka sorkar halor kane ka jingkiew kynsan ka bill light, namar lada ki shim kumba ki juh shim na ka por lai bnai ka dei ban long tang T.750/- tyngka lai bnai.
Haba ia dei bad u MDC jong ka Mawhati u bah Charles Marngar, u la iathuh ba u la ioh ia kum kine ki jingujor na ki katto katne ngut ki briew ha kine ki sngi, hynrei la sngewthuh ba kane kam dei tang ia kawei ne ar tylli ki shnong kane ka jingkiew bai light ka long la jan baroh ki shnong.
La ong ba kum u MDC ka thain un saw at jingtip shuh shuh halor kane ka jingai bill light thulmur jong ka MePDCL, la kynnoh ba kane baroh ka dei ka jingleh klumar jong ka MePDCL, ha dien ba u la ioh ia ka jingtip un sa iakren ban pynbeit ia kane ka jingleh bakla.
