Shillong, Naiwieng 07: U Bah Lambor Malniang uba dei u MLA bad u MDC ka Nongkrem ha kajuh ka por uba dei ruh u Chairman ka State Planning Board hynne ka sngi u la plie paidbah ia lai tylli ki jingkieng iaid kjat hapoh ka shnong Madanriting Block-G na ka bynta ban pynsuk ia ka leit ka wan jong ki paidbah.
Na ka liang u Bah Lambor u la pyntip ba ia kine ki lai tylli ki jingkieng u la sei na ka tulop MLA ia kaba u la kynshew ban phah shna ia kine ki jingkieng ban pynsuk ia ka leit ka wan bad khamtam eh na ka bynta ki longkmie kiba im bylla sngi da kaba saitjain namar ba ki shem jingeh bha lada slap namar ba ym don lynti na wei pat.
Kane kadei ka jingangnud ba la slem bha jong ki paidbah kane ka shnong namar ba ha ki por mynshwa namar kane kadei ka jingkieng ba la shu buh da ki dieng ban iaid lyngba na shilliang sha shilliang hynrei hadien ba u MLA kala long ka jingkyrkhu ia ki paidbah.
Ka jinglut jingsep baroh jong kine ki lai tylli ki jingkieng bad kawei kadei ka lynti iaid kjat kala kot sha ka T.7 Lak tam ia kaba u Bah Lambor u la ai ban phah trei lyngba ka tulop MLA ka jong u.
Haba kren ha ka jingialang lyngkot ha shwa ban plie paidbah ia kine ki jingkieng u Bah Lambor u la ong, Kane ka jingwan rah ia kine ki lai tylli ki jingkieng ka long kum shi bynta ban wanrah ia ka jingkylla ha kane ka shnong ha ka liang jong ka roi ka par.
Ka shnong Madanriting kadei ka shnong kaba la heh bha bad haba phi peit ia ka na sha khmat bun ki ong ba kadei ka shnong kaba biang lud nadong sha dong hynrei haba rung pat sha ki wei ki bynta ngi shem ba kadei ka shnong kaba dang donkam bha shibun ia ki kam pynroi u la ong.
“Dei halor kane ka bynta, hadien ba ka election kala kut bad kadei ka kam ram ka jong nga kum u nongmih khmat ban peit ia ka roi ka par ka bha ka miat na ka bynta ki shnong ki thaw bad na ka bynta ka jingsuk ki paidbah nongshong shnong” ong u Bah Lambor.
U Bah Lambor u la ong mynshwa nga la iaid lyngba ha kane ka dong ban leit sha shilliang hap ban iaid lyngba ki jingkieng ba shu pun da ki dieng bad ahab poi ka por slap ka um bunsien ka ju rah noh ia ki, kumta nga la phah ban trei ia kine ki jingkieng ban suk ki nongleit nongwan.
Na ka liang jong u Rangbah Shnong ka Madanriting haba kren lyngkot u la ai ka jingiaroh ia u Bah Lambor uba kloi ban iohi ia ka jingeh jong ki paidbah bad uba sted ruh ban wanrah ia ki kam pynroi ha ka shnong ka thaw ha ki liang baroh.
Na ka liang jong ki longkmie kiba im ha ka bylla saitjain ban pynbit pynbiang ia ka im ka ïing ka sem kila pynpaw ia ka jingsngewnguh ia ka jingleh u MLA da kaba u la pynshna da ki jingkieng bad kumjuh ruh ia ka lynti iaid kjat namar ba mynta kim donkam shuh ban iaid lyngba ki surok ktieh kiba ngam haduh khoh siew haba ki iaid ha ki por slap.
