New Delhi, Risaw 20: Ia ka “National Police Memorial” un plie da u myntri rangbah duh jong ka Ri India u Narendra Modi la shai ka sngi kaba dei ka sngi kynmaw burom ia baroh ki pulit kiba la aiti iala ka jong ka jingim ban iada ia ka Ri naduh ba la ioh ia ka jinglaitluid.
Ka Ri India kala rakhe ia ka 21tarik u bnai Risaw naduh ka snem 1959 ha kaba ki pulit kila shah pyniap ha ki shipai jong ka Ri China ha Ladakh ha ka jaka kaba la tip kum ka Hot Springs.
Kane ka ‘National Police Memorial” la tei ha ka jaka ha Chanakyapuri bad ka jingheh ka jaka ka long 6.12 akar ha ka bynta ba sha neng jong ka Shanti Path. Kane ka jaka kan long ka jaka kynmaw burom ia baroh ki pulit bad kiba dei jong ka sorkar pdeng bad kum juh jong ki sorkar jylla ha ka Ri baroh kawei.
Naduh snem 1947 haduh mynta baroh ki pulit ha ka Ri kiba la aiti ia la ka jong ka jingim ban iada ia ka Ri ki long 34,844 ngut bad mynta u snem kiba la duh ia la ka jong ka jingim ki long 424 ngut, kine kiba la duh ia la ka jingim ka dei ha ka jingiakhun pyrshah ia ki kam lehnoh kum ha Kashmir, Punjab, Assam, Nagaland, Manipur, Mizoram bad ki jaka ba don ki left wing extremist.
Bun ki pulit ruh kila duh ei ia la ka jong ka jingim ha kaba ia leh ban the lakam ia ki kam sniew bad ban pynneh ia ka jingshong suk. U ne u mawmot shah kynmaw ban burom ia ki riew shlur bala aiti ia lade na ka bynta ka Ri, u jrong 30 phut, ka jingkhia ka long 238 tone. Ia ka kyrteng jong baroh ki 34,844 ngut la thoh ha u tei u maw marble. Ha kane ka jaka ruh kan don ka jaka buh jingkynmaw ia ki pulit ba kumno ka parom ka iaid ha ki pulit jong ka Ri India.
