Shillong, Nailur 25: Ki samla pule Pharmacist hapoh ka Jylla ha ka 24 tarik u Nailur 2024 ki la leit ban aiti da ka dorkhas sha ka Myntri ka Koit ka khiah ka Dr M Ampareen Lyngdoh ha ka ba kila pynpaw ba ka jingkyrduh kam naka bynta kito ki samla kiba la pyndep iaka jingpule Pharmacist kadei namar ka jingbym treikam bha ka Pharmacist Council jong ka Jylla.
Ha ka jingiakren bad ki nongthoh khubor na ka liang u samla Emos john Syiemlieh u ba long kum u nongialm kane ka kynhun u la ong ba ka Pharmacist Council kala don naduh 1992 hapoh ka Jylla.
Hynrei haduh mynta ka Tnad ka Koit ka Khiah kam pat pynthymmai iaki dkhot bad ki nongkitkam hapoh ka Council. U la ongruh ba Ka thong jong ka Pharmacist Council ka dei ban bishar iaki dawai, naduh ka jingshna haduh ka jingdie bad ka jingdih iaki jait dawai.
U samla Emos u la ong ruh ba ki samla pule Pharmacist kin sa thaw daka Association naka bynta ban iakren halor ka bha ka miat ki samla pule Pharmacist jong ka Jylla.
U la pyntip ba ki samla pule kila kyntu iaka Myntri ban thungkam Pharmacist hapoh ki CHC, PHC bad haka juh ka por ban thaw daka Pharmaceutical Industry hapoh ka Jylla.
Katba na ka liang ka Myntri ka tnad ka koit ka khiah ka Dr M Ampareen Lyngdoh ka la pynpaw ba na ka liang ka sorkar ka la sngap bad shah shkor ia ki jingdawa jong kine ki kynhun ha ka ba kan sa don ka committee ka ban khlieh da u commissioner secretary ka tnad ka koit ka khiah u Joram Beda IAS, u ban peit ia kine ki jingdawa jong ki.
Ka la ongruh ba kane ka dei ka sien ba nyngkong ia ka kum ka myntri ba kan ioh ban ia kynduh bad kine ki kynhun ha ka ba ka la pynpaw ba kan sa ioh ban ia kynduh pat bad ki ha ka 28 tarik u Nailur ha ka ba kan ioh ban batai ia kiei ki kam ki ba lah ban leh khamkloi.
