Shillong, Jylliew 25: Namar ka khlam covid la pynlong noh tang shisngi iaka dorbar lyiur ha KHADC, kaba la sdang mynta ka sngi.
Hadien ba lah dep ki jingiakren baroh hapoh ka iing dorbar u shongknor u bah Pyniaid Syiem u la kylli ia u CEM hato ka EC ka don ey ey ban pynsngew haka iing dorbar.
U bah Titus starwell Chyne ula Pynsngew hapoh ka iing dorbar namar ka jinglong jingman kane ka khlam covid kam pat long kaba shngaiñ, u la kyrpad iaki dkhot ka iing dorbar ba lada long kaba lah ban pynkut noh mynta ka sngi iakane ka dorbar lyiur.
U CEM la pynsngew hapoh ka iing dorbar ba katkum ka A.D rule ka 47 (1) bad 47(2) ka batai ba iaki mat iakren kiba sah lah ban wanrah biang hakawei pat ka jingiashong dorbar.
Halor kane ka jingtyrwa jong u CEM u bah P. N Syiem MDC jong ka Mawkhar Pynthorumkhrah la ong ba katkum ka rule ba 9 ka krenshai ba ka jingiashong dorbar ka dei ban long man la ka saw bnai bad ka EC kala pyndep iala ka kamram bad u pynsngew ba u pdiang iakane ka jingtyrwa u CEM.
U nongialam ka liang pyrshah u bah Lamphrang Blah u la pynpaw ba ka liang pyrshah ka pdiang iakane ka jingtyrwa halor ka kyndon katkum ki rule ba la dep kdew ba iaki mat iakren kiba la buh ban long haka sngi Nyngkong yn rah sha ka dorbar kaban sa long pat ha dien.
