Shillong, Nailar 12: U myntri khynnah ka sorkar pdeng u Bishaweswar Tudu mynta ka sngi ha ka jingiakynduh bad ki ophisar ka sorkar jylla ban pan jingkhein ha kaba ia dei bad ka jingpyntrei kam ia ki skhim jong ka sorkar pdeng kiba dei na ka tnad sam um bad na ka tnad pynneh pynsah ia ki riewlum.
Haba kren ia iaid bad ki lat pathai khubor ha State Convention Centre la ong ba um hun ia ka jingleh jong ki ophisar, ha kane ka jingia kynduh ki shu batai ia kaei kaba ki la leh hynrei kim shym la ai da ki jingthoh ha kaba ia dei bad ki skhim, khatam ia ka jingsam um sha baroh ki shnong.
La ong ba ha Meghalaya ka jingpynpoi ia ka um bam umdih sha ki iing ki iing lyngba ka skhim Jal Jeevan Mission ka long 44% katba ha ka Ri India baroh kawei ka dang long 51%, ka thong jong ka sorkar ban pynioh um sha baroh ki tnum iing ha ka Ri India ka long ha u bnai Risaw 2024.
Haba jubab ia ki jingkylli na ka liang jong u myntri khynnah ka sorkar pdeng la ong ba haduh mynta kam shym don kano kano ka jingujor pyrshah ia kano kano ka skhim, lada ka don ka jingujor un sa peit bniah hynrei ia mynta kam shym don kano kano ka jingujor ia ki jingtrei.
