Shillong, Naiwieng 29: U Lamphang ka iing dorbar thawain ka jylla u bah Metbah Lyngdoh mynta ka sngi u la pynshai ba haduh mynta ym pat ai kata ka rai ban ithuh ia ki kum ki dkhot ka party AITC wat la ia ka jingthoh u la dep ban ioh ha kane ka taiew kaba la dep.
U bah Metbah u la ong ba kaei kaba ki ia kren ka long hapoh ka kynhun jong ki hynrei na ka liang jong ka ophis haduh mynta kam pat ai kano kano ka rain namar ka ophis ka dang bishar bniah halor kane.
U Lamphang u la ong ba mynta ka sngi na ka liang jong ka party Congress kala wan ai ia ka jingujor, ha kaba la wan ka Dr. Ampareen Lyngdoh, bah Process T Sawkmie bad bah Mohendro Rapsang, katba u bah Kimfa S Marbaniang bad u bah Mayralborn Syiem kim shym la don lang namar ki don sha la ki kam.
La ong ba u la ioh pdiang ia ka jingthoh bad ka kot kaba ryben bha kaba u dang hap ban pule ia kane ka jingthoh. Ha kane ka jingiakynduh na ka liang jong ka Congress kila ong ba kane ka jingphet seng ka ktah ia ka ain kyntiap seng.
Haba jubab ia ka jingkylli la ong ba yn nym lah ban ong ia ka por namar ba u dang hap ban peit bniah ia ki kot ki sla kaba la ai da ki 12 ngut ki MLA ha kane ka taiew kaba la dep bad la sdang ban pule hynrei mynta ka ngi la wan sa kane ka jingthoh na ka party Congress.
