Shillong, Naitung 06: U Nongbishar rangbah duh jong ka High Court jong ka jylla Meghalaya u Justice Ajay Kumar Mittal, mynta ka sngi u la plie ia ka jingialang halor ka phang “ Ki iing Bishar jong ki District Council hapoh ka jylla Meghalaya” ia kane ka jingiamir jingmut la pynlong ha Conference Hall jong ka High Court jong ka jylla Meghalaya, Shillong.
Ia kane ka jingialang kaba shisngi la pynlong da ka “Meghalaya State Judicial Academy” ha kaba u Justice Justice H S Thangkhiew, u nongbishar jong ka High Court jong ka jylla Meghalaya, u bah W Diengdoh, District Judge bad ki ophisar jong ka High Court jong ka jylla Meghalaya bad na ki District Courts kila ia don lang.
Ha ka jingkren plie jong u Nongbishar rangbah duh jong ka High Court jong ka jylla Meghalaya u la ong “ Nga dap da ka jingsngew kmne bad ka Meghalaya State Judicial Academy ka pynlong ia kane ka jingiamir jingmut halor ka phang Ki iing bishar jong ki District Council ha Meghalaya, kaba long kaei kaei kaba thymmai na ka bynta jong nga, ngan pyrshang katba lah ban sngewthuh kumno ki iing bishar jong ki District Council kin trei kam ha kane ka jylla, ka jingiaroh ka leit sha ka Meghalaya State Judicial Academy, kaba la plie lynti”.
Ha kane ka jingialang na liang jong u Nongbishar rangbah jong ka High Court jong ka jylla Meghalaya u la ong ba la iathuh ia u ba ha kane ka jingialang ba mynta ka sngi kila don ki riew shemphang, ki nongbishar na ki iing bishar jong ki District Council, ki muktiar, ki ban ia kren bad ia phylliew jingmut ha kane ka jingialang bad kane kan long ka jingmyntoi kaba khraw shibun.
Ha ka jingkren jong u Nongbishar rangbah, u la shim ruh ia kajingkren jong u wei na ki muktiar ba pawnam u Nani A. Palkhivala, ha kaba u la ong, “ ka synshar paidbah, ka jingiatylli bad ka jinglong kawei jong ka Ri ka shong kyrpang eh ha ka jingsngewthuh iaka riti synsahr jong ka Ri, ka Dharma ka im ha ka dohnud jong ki paidbah, lada ka iap noh, yn nym lah ban don ka jingpynkylla ban pynim ia ka”.
U Nongbishar rangbah duh jong ka High Court jong ka jylla Meghalaya, ula ong ba ka, Sixth Schedule jong ka Riti synsahr ka dei ka riti synshar jong ka Ri kaba pyniaid ia ki jaka jong ki riewlum ha ki bynta jong ka thain shatei lam mih ngi jong ka Ri India. Ka jingthmu ka long ban ai ia ka bor ha ki riewlum khang ba kan long ka jingkdew lynti ha kaba ia dei bad ki riti dustur jong ki khang ban kin nym shuh khynait noh ha kane jingshynshar jong kane ka juk kaba mynta, kane ka long ba kin ioh ia ka lad ban ia kren bad ba kin san katkum ka jingstad bad ka jingshem phang ka jong ki, ia kane la ai tang ha ki katto katne ki jaka jong ki riewlum.
Ka Article 244 jong ka Riti Synshar jong ka Ri India kala buh ia kane ka bynta ban pyniaid ia ki jaka kiba hap ha ki jaka jong ki Riewlum. Ka Riti synshar kala buh ia kane ka bynta kaba kongsan ban peit ban khmih ia ki jaka ba bun ki riewlum kum ha ka jylla Assam, Meghalaya, Tripura bad Mizoram. Katkum ka article 244 jong ka 6th Schedule, ia kine ki jaka la tip kum ki Riewlum “Tribal Areas”, kine ki iapher na kito kiba hap hapoh jong ka Schedule kaba san. Kumba ka long mynta ki don shiphew tylli kum kine ki Councils ha kane ka thain, ha kaba ka jylla Meghalya ka don lai tylli, Khasi Hills Autonomous District Council, Jaintia Hills Autonomous District Council and Garo Hills Autonomous District Council.
Ka jinglong kyrpang ha Meghalaya ia ka bishar ka khaddar ka long ba ki don ha ki lai bynta ki iing bishar kiba la buh ryntih katkum ka ain, kaba nyngkong ka dei kata ka “Normal Areas jong ka sor Shillong kaba kynthup iaka ki lai tylli ki Municipal Wards jong ka Police Bazar, Jail Road, European Ward bad ki jaka jongka Cantonment, ha kaba ka jingbisahr iaki kam sniew bad ki mukotduma kum ka Civil Code ki treikam katkum ki kyndon baroh.
Ka iing bishar jong ki District Judge bad kiba hapoh jong ki don ia ka bor jong ki halor kine ki jaka katkumka Bengal, Agra, Assam Civil Courts Act, 1887. Bad ka jingbatai ia ka sub-section (2) of Section 1 of the Code of Criminal Procedure, 1973 kala kren shai ha kaba ia dei bad ka jinglong kyrpang hangne ha Shillong.
Kaba ar ka long, u Deputy Commissioner bad ki nongiarap jong u la pynkupbor bad kin shim bisahr halor kki mukotduma civil bad criminal habor kawei ka jylla Meghalaya lait noh ha ki Normal Areas jong ka Shillong, hapoh ki kyndon jong ka rules jong ka Administration of Justice and Police in the Khasi and Jaintia Hills District 1937; The Rules for the Administration of Justice and Police in the Garo Hills District 1937; and The Khasi Syiemships (Administration of Justice) Order, 1950.
Kaba lai ka rukom bishar ha kane ka jylla la shem ba ka jingdon jong ki District Council Courts kiba don ia bor tang ha ki jaka ba hap hapoh upud u sam jong ka jingpeit jong ki Autonomous District Councils i.e., Khasi Hills Autonomous District Council, Jaintia Hills Autonomous District Council and Garo Hills Autonomous District Council, kiba la pynkut bor iaki hapoh jong ka Sixth Schedule ka Riti synsahr jong ka Ri.
Ia ki District Council Courts la saindur hapoh jong ka United Khasi-Jaintia Hills Autonomous District (Administration of Justice) Rules, 1953 na ka bynta kiba hap hapoh jong ka Khasi Hills District; ka Jowai Autonomous District (Administration) Act, 1967 na ka bynta ka Jaintia Hills District; bad ka Garo Hills Autonomous District (Administration of Justice) Rules, 1953 na ka bynta ka Garo Hills District. Kaba pawshynna ban kdew ka rukom bishar ha ka bynta kaba ar bad balai ka long ba la bud ryntih hapoh kine ki iing bishar katkum ki kyndon bad ki rules bala buh.
Bah buh lyngkot ba ha ka jylla Meghalaya lait noh ki jaka ba hap hapoh jong ka Cantonment bad ki Normal Areas kiba kynthup ia ki bynta jong ka Shillong Municipal, ka jingbatai kaba shai ka long jaka “Riewlum” ba la tip kum ki “Tribal Areas” ha ka ktien nongwei hapoh ka Riti synsahr jong ka Ri India. Ka jingshim ia ka bishar khaddar hapoh kine ki jaka jong ki riewlum la shim na paragraphs 4 bad san 5 jong ka Sixth Schedule jong ka Riti synshar jong ka Ri India; bad ia ka ktien “ Administration of Justice Orders and Rules” kumba la kdew haneng.
Kane ka jingialang mynta ka sngi kaba la phiah sha ki lai bynta bad ka phang ban ia phylliew jingmut haka bynta kaba nyngkong ka long, ka the Sixth Schedule, ka parom jong ka bad kumno ka trei kam ha ki jaka Sixth Schedule ha ki jaidbriew riewlum ha kane ka jylla Meghalaya, ka bynta kaba ar ka long ka iing bishar ba ha khliehduh jong ka Ri India bad ka jingiadei bad ki District Councils ha Meghalaya bad ka bynta kaba lai ka long ka bor bad ka jingtrei kam jong ki District Council Courts, ha kaba baroh ki riewshemphang kin ia their halor kitei ki pahng.
Na ka liang jong u nongbishar b rangbah duh jong ka High Court jong ka jylla Meghalaya U Justice Ajay Kumar Mittal ula ai ka jingiaroh ia ka Meghalaya State Judicial Academy kaba la pynlong kane ka jingialang kaba kyrpang ban ia sngewthuh ia kane ka phang. U la ong ba un sa leit ban jngoh ia ki iing bishar jong ki District Council ha kane ka jylla Meghalaya.
Ha ka jingkren jong u Justice H S Thangkhiew, u la ong ba ka jylla ka don lai tylli ki District Council Court, ka Autonomous District Council Courts Khasi Hills Autonomous District Council, (KHADC), Jaintia Hills Autonomous District Council (JHADC) bad ka Garo Hills District Autonomous District Council (GHADC) la ai bor ia ki ba kin bishar ha pdeng ki riewlum.
Ki District Council Court jong ki iing bishar ki kynthup ia ki nongbisahr kiba la pyntbit kyrpang bad la ithuh ia ki kum ki nongbishar kiba la thung da ka Executive Committee lyngba ka jingmynjur jong u Lat ka jylla hapoh jong ka United Khasi-Jaintia Hills District (Administration of Justice) Rules, 1953, ha kaba la buh lai tylli ki kyrdan jong ki iing bishar, ka Village Courts, Subordinate District Council Courts bad District Council Court. Kine ki iing bishar ki shim ia ka jingtianbishar tang lada long ha pdeng ki riewlum bad ki ai iaka rai katkum ka riti dustur ka jong ki.
Haba la kren halor ka jingtreikam jong ki District Council Court katkum ki riti dustur haba ki mih ki jingeh kumno ban pynbeit, na ka liang jong u Justice Thangkhiew u la pynsngew ba dei ban don noh ban pynbeit ryntih ia kane ka rukom ban pyniaid beit ia ka bishar khaddar na ka bynta ka jingmyntoi jong ki paidbah.
Ki riew shemphang kiba la ai jingkren ha kane ka sngi ki long u Dr. O L Snaitang, Bah T T Diengdoh, Sr. Advocate bad u Dr. S Kharsyiemlieh, nongbisahr jong ka District Council Court. Kiwei kiba la ia don lang ki long ka kong, Belma Mawrie, Registrar General, High Court jong ka Meghalaya; u bah W. Diengdoh, District & Sessions Judge, Shillong; Kong MB Challam, Director, Meghalaya State Judicial Academy; ha kane ka sngi la don lang ruh ki muktiar na kane ka jylla kiba la wan ban ia shim bynta.
