Shillong, Naiwieng 02: Ki MDC jong ka seng Congress hapoh jong ka KHADC kila dawa ba dei ban khot ia ka dorbar ba kyrpang ban ia kren hapoh iing dorbar ha kaba ia dei bad ka jingmang ia ki MDC Konstitwensi, la ong u bah Charles marngar bad u bah Banjop Pyngrope.
Haba kren ha ki lad pathai khubor mynta ka sngi kila pynpaw ba ka long kaei kaei kaba sngewsih ban tip ia ka jingleh lyndet jong ka sorkar jylla Meghalaya ha kaba ia dei bad ki MDC Konstitwensi hapoh jong ka KHADC, la iathuh ba kila tip ba ka sorkar kala ai jingthoh sha ka Standing Parliamentary Committee(SPC) kaba dei peit jingpynkylla ia ka Sixth Schedule ba dei ban don 40 tylli ki MDC Konstitwnesi ha KHADC.
U Bah Charles u la ong ba ha ka jingialang kaba la long ar sien hapoh jong ka KHADC kila shim ia ka rai ba ki kwah ban don tang 31 ngut ki MDC bad ia kane la phah sha ka sorkar, katkum ka rai ka long ba 29 ngut dei ban jied da la ilekshon, ar ngut dei ban shu tung ha kaba kawei dei ban long ka kynthei.
Hynrei kaba la pynbitar ha ki haba kila poi sha Delhi haba kila ia kynduh ia u Lamphong jong ka SPC u Annan Sharma kila ioh jingtip ba ka sorkar kala phah 40. Dei halor kane ka nongrim ba na ka liang jong ka seng Congress hapoh jong ka KHADC ka dawa ba dei ban khot ia ka dorbar ba kyrpang ban iakren ia kane mano ba leh ia kane ban ia shai namar kam shym long kumba la ia kren.
La iathuh ruh ba na ka liang jong ka FOCUSS kaba dei jong ki kynthun jong baroh ki MDC na ki District Council bapher bapher jong kane ka dong shatei kam mih ngi jong ka Ri India kila ia kynduh ia u Anna Sharma bad ha kane ka jingiakynduh la pan por shuh ban pynjlan ia kane ka SPC bad na ka liang jong u u la kular ban pynjlan shuh ia ka por da hynniew taiew bad hapoh kine ki taiew un wan sha Shillong bad ha Guwahati ban ia kynduh ia ki paidbah ban sngewthuh ia kaei kaba ki paidbah ki don ban ong.
Kitei ki MDC jong ka Congress kila pyni ba na ka liang jong ka tnad kam poh iing jong ka sorkar pdeng kala phah ia ka shithi ha ka 27/10/2019 sha u Chief Secretary jong ka jylla ban pyntip sha ki MDC halor kane ka jingialang ha Delhi balei ka sorkar kam shym la lah ban pynpoi sha ki MDC balei ka sorkar ka set la kynnoh kitei ki MDC.
