Shillong, Lber 26: Mynta ka sngi ki paidbah na kylleng sawdong jong ka thain Jowai kila poi ha Iew Musiang ban leit die ia ki jhur ki jhep, hynrei da la poi ha Iew Musiang Jowai la khang da ki bor ba pyniaid ia ka District.
Haba kren ha u SP News Agency na ka liang jong u Deputy Commissioner jong ka West Jaintia Hills District, ban khang lad ia ki paidbah kila hap ban pyndon kam “Lathi Charge” ha ki katto katne tylli ki dukan ban pynbor ia ki ban khang.
La iathuh ba katkum ka jingpynbna kaba nyngkong ka long ba mynta ka sngi la dei ban shah ia ki briew, hynrei haba la wan biang ka jingpynbna ka khang bad ia kane la pyntip sha ki paidbah, hynrei kala don ka jingpynsaphriang khubor ba ha kiwei ki bynta la plie ia ka iew da ki riew shim kabu.
Kane ka jingpynsaphriang ia ki khubor ki bym dei kala pynlong ia ki paidbah ban wan sha iew. Ha dien bala pynsngewthuh ki paidbah kila leit phai noh sha la ki shnong ki shnong bad na ka liang jong ki bor ba dei peit ia ka District kala phah khang ia baroh ki dukan mynta ka sngi.
Ha ka juh ka por na ka liang jong u DC u la ong ba la dep ban pynbna sha ki paidbah ba la shai ka sngi kin shah ban plie ia ki dukan ha ki dong ki dong jong ka sor Jowai bad ki la pynbna ruh ba kin briew ki lah ban phone sha ki number ba ki briew kila lah ban thied ia ki mar ki mata bad ban pynpoi sha iing jong ki katkum ka jingdon kam.
Na ka liang jong u DC u la kynnoh ba kane ka jingjia mynta ka sngi baroh kadei na ka jingpynsaphriang ia ki khubor lyngba ki Media, na liang jong ka ophis kala pynbna ia kaei kaba la bthah bad kila pyrshang ban pynpoi sha baroh ki shnong ia ka jingpyntip.
Haba kren bad ki katto katne ki riew paidbah kila iathuh ba ki shim ia ka jingtip kaba la pynmih nyngkong ba ka iew kan plie mynta ka sngi, hynrei ia kaba pynmih ha dien namar ba ki shong ha ki shnong kim shym la ioh ia kata ki jingyntip, la kyntu ia ki bor ba dei peit ba naneng sha khmat dei ban pynkhlain ia ki lad pathah jingtip ba ki paidbah kin nym kynduh jingeh.
