Shillong, Nailur 26: U Myntri ba dei peit ia ka tnad District Council Affair u James K Sangma ba dei ruh u lamphang jong ka “special Committee” ba la thaw kyrpang ban peit ia ka jingpynkylla ia ka Sixth Schedule u la ong ba ha kane ka jingialang baroh la ia mynjur ba ia ka ktien “Unrepresented tribes” ba dei ban weng na ka jingthmu ban pynkylla ia ka khyrngit kaba hynriew jong ka Riti Synshar jong ka Ri India.
Haba kren ha ki lad pathai khubor ha dien ka jingialang, u James K Sangma u la ong ba ha kane ka jingialang kaba la long mynta ka sngi baroh kila ia mynjur ba ia ka kyntin “Unrepresented Tribes” kin thoh sha ka Standing Parliamentary Committee jong ka Rajya Sabha ba dei ban weng ia katei ka kyntin.
Kiwei ki bynta, haba ia dei bad ka KHADC, ka jingkwah ka long ban jied ia ki MDC da ki paidbah ka dei bna long 29 ngut kumba juh long bad dei ban thung tang ar ngut bad kawei ka dei ban thung ia ka kynthei, katba ia ka JHADC kumba ka long kam pat shai kumba ka long mynta, katno ngut hap ban jied da ki paidbah bad katno ngut hap ban shut hung.
Haba ia dei bad ka kyntin “Village Council” dei ban weng namar ha Khasi Hills bad Jaintia Hills ki don ki dorbar hima, Dorbar raid bad ki dorbar shnong, katba ha GHADC ha Garo Hills ia ka kyntin “Village Council” dei ban pynneh namar kala don ka ain kaba la pdiang da ka iing dorbar naduh u snem 1948.
Haba ia dei bad ka State Election Commission kala don ka jingiakren, ba ia ka MDC ilekshon dei ban pyniaid da ka SEC, katba ia ki ilekshon sha ki dorbar shnong kan pyniaid hi ki District Council kiba hap hapoh jong ka KHADC bad JHADC.
Na ka liang jong u myntri ba dei peit ia ka tnad District Council u la ong ba mynta kin sa thoh ia kane ka rai kaba ka shim mynta ka sngi bad ha dien ba la dep ban thoh yn phah sha baroh ki dkhot jong kane ka committee bad ha dien bala dep ban ia peit bniah kin sa phah sha ka Standing Parliamentary Committee.
Haba la kylli hato ka Standing Parliamentary Committee kala phah jingtip sha ka sorkar ba kan wan sha kane ka jylla, na ka liang jong u myntri u la ong ba haduh mynta kim pat ioh ia kano kano ka jingtip ha kaba ia dei bad ka jingwan jong ka SPC.
