Shillong, Jylliew 9: Ka Khasi Students’ Union mynta ka sngi, ka 09/06/2021 ka la noh jingiarap sha ka Supercare Hospital da 30 tylli ki PPE, 5 tylli ki tyndong Oxygen bad ka pisa khyndiat.
Na ka liang ka seng kiba la leit ban mihkhmat ki kynthup ia u samla Donald V Thabah General Secretary, KSU, samla Shemphang L Mawphlang Litigation Secretary, KSU, samla Eric Nongkynrih Assistant General Secretary, KSU bad ki dkhot ka KSU Nongthymmai Circle. Na ka liang ka Supercare Hospital pat la wan pdiang da i Dr. RS Thangkhiew, Dr. Mrs. P Nongbet lem bad kiwei ki staff.
U samla Donald u la ong ba ki jingiarap jong ka seng sha kane ka hospital ki long kiba rit, hynrei kum ka seng ka la trei borbah ban ioh ai ia kitei ki jingiarap kum shi bynta ban kyrshan lem ia katei ka hospital kaba dang don hapdeng ka jingiakhun pyrshah ia ka khlam COVID-19.
U General secretary ka KSU u la ai khublei kyrpang ruh ia ki paradoh parasnam kiba la noh synniang kylluid mynsiem ia ka seng ba kan ioh ban ai jingiarap ia ki paidbah ha kiba bun ki liang ha kum kane ka por.
U samla Donald u la kyntu ruh ia ka sorkar ba ka dei ban ia snoh kti lem bad ki dorbar shnong bad kynhun seng ban ai jingshai sha ki paidbah ha kylleng ka jylla halor ka Vaccine pyrshah ia kane ka khlam lyngba ki riew shemphang ha ka lain dawai dashin.
U la bynrap ruh ba namar ka jingjynjar ka network ha kiba bun ki jaka, ka shem jingeh ia ki paidbah ban sngewthuh ia ka rukom iarap kane ka vaccine khamtam lei haba don ki khubor hamsaia halor ki side effects kane ka vaccine.
I Dr. RS Thangkhiew i la ai khublei ia ka KSU bad i la pynkynmaw ruh ba i la don ka jingiadei bad ka seng ha ki snem 1978-1979. I la pyntip ruh ba ka vaccination drive ha Supercare Hospital kan sdang naduh lashai ha kaba yn pdiang haduh 100 ngut ki briew ha ka shi sngi.
I Dr. (Mrs) P Nongbet i la ong ba ka dei ka sien kaba nyngkong kaba ka hospital ka ioh jingiarap na shabar. I la kren ruh shaphang ka jingeh ki nongtrei hospital kaba ki ia kynduh man ka por.
