Shillong, Risaw 28: U Chief executive Member jong ka KHADC u bah Titosstarwell Chyne u la ong ba dang shen kane ka mat ia kren ba ki kynthei ruh kid ei ban ioh shong dorbar lang bad ki kynthei na Mawlai Pyllum kila wan ban ia kynduh ban ia kren halor kane ka phang ba ki kynthei ruh kinioh ban ia don noh ha ki dorbar.
U CEM u la ong ba ha ka jingshisha katkum ka riti dustur jong u khasi ki kynthei kim juh shong dorbar dei tang ki rangbah kiba shong dorbar kata ka dei ka nongrim kum ka jaidbynriew, ia kaba u don ha katei ka shuki kaba ki ong ban pynneh pynsah ia ka Riti Dustur jong ka jaidbynriew.
Haba phai pat sha ka jingiaid jong ka por, ka jingdawa jong ka por, u CEM u la pynkynmaw ia ka jingiaid jong ka por, lada phai sha ka mynnor ym juh ioh sngew koit ba ki kynthei kin ia mih ha kino kino ki kam kiba ia dei ha ka imlang sahlang bad ka kam kum ki long kmie ka long ban pynheh pynsah iala ki jong ki khun ban bsa btiah iala ki khun ki kti.
U Rangbah un leit la ka kamai ka kajih yn pynbiang ia ka bam ka dih ha iing ha sem kane la long naduh ki por kulong kumah bad u rangbah u long u rang khatarbor u ba tip ia ka iap ka im, batip ban bsa btiah ia phi long kmie bad ki khun ki kti.
Khyndiat katto katne por ka bor jong ka jignstad kala wan rung kala wanrung ha kane ka Ri ka jong ngi bad ha kaba nyngkong kiba leit skul kiba bun dei ki shynrang ia ki kynthei ruh kim pat phah ban leit pule ne leit skul, hynrei suki suki ki kynthei ruh ki ia shim bynta ha kaba leit skul.
Ha dien ka jingwan ka jingnang jingstad ka rukom im kala khampher ka rukom pyrkhat kala khampher, haba kren solansar mynta ba kamai mynta ym dei shuh tang u rangbah ka kynthei ruh ka ia treilang ban ia bsa btiah ia ki khun ki kti ha ka long iing la sem, la ka long ha kaba trei ophis, khaii pateng, shongiew shonghat bad kumta ter ter.
Haba phai sha ka synshar ka khaddar, haba ki long kmie kila sdang ban ia nang ia stad kila sdang ban ia shim bynta ha kaba ia dei bad ka imlang ka sahlang na kata ka daw ha man la ki dorbar shnong ki mih kita ki seng long kmie, seng kynthei kiba ia don bynta ryngkat ryngkat bad ki dorbar shnong ban ia kren bad ki kam kiba ia dei ha ka imlang sahlang.
Ka jingong ba ki kynthei kim juh tip ei ei ia kaba ka dorbar shnong ka rai, hyhnrei haba ka dorbar shnong ka shim ia kano kano ka rai ka juh don la u jong u sangot ban pyntip paidbah ia kaei kaba ki rai hapoh ka dorbar shnong.
Ka juh don ruh ka rukom pyniaid shnong, la da kim lum ia ka dorbar hynrei ki lum ia ka jingpyniaid paidbah ha kaba shisien shisnem ha kaba ki longkmie ki khun samla ki ia shim bynta lang ha kaba ka shnong ka pynsngew ia ka rukom trei kam ka shnong lane kaei ka rai.
U CEM u la ong ba ka rukom pyniaid shnong ka iapher na kawei ka shnong sha kawei pat ba ki hap ban pynkylla ia ka rukom treikam haki dorbar shnong katkum ka jingdawa jong ka por, hynrei ha ka juh ka por ban ong pat ba ki kynthei kin long rangah shnong, kin long sordar ba ia mynta hi kam pat dei ka por.
U CEM u la ong ba dang hap ban bat ia ka riti dustur, dang hap ban bat ia ka burom ka akor, hynrei ban ong pat ban pynioh ia ka hok jong phi ki kynthei bad pynsngew ia ka sur jong phi ki kynthei sngew ia hap ia kata ym ban set ia ka shyntur jong ki kynthei, ka dei ban don ka jaka ban ailat ba ki lah ban pynsngew ia ka jingdon kam.
Dei na kane ka daw ba ka wan ka jingkylla ha ka rukom pyniaid ha manla ki shnong ki shnong, la don ki seng long kmie, la don ki kynhun treilang, kidon ki seng ha ki shnong bad na ka liang jong u CEM u pynshai ruh ia ka jingong haba ia dei bad ki skhim bapher bapher ba ki kynthei kim ia ioh bynta.
Haba ia dei bad kane na ka liang jong ka KHADC kan wan rah ia ka Bill ha kane ka sien shong dorbar ba katkum kata ka bill ka long ba ha man la ki shnong kan don ka “Village Development Council” ha kaba u shongknor un long u rangbah shnong bad ki dkhot jong ka long na ka bynta baroh ha kaba ki kynthei ruh kin ioh ban ia shim bynta bad ka jingtreikam kan long shisien san snem bad ka jingjied kan long da ka ilkeshon.
U bah Titosstarwell la ong ba to yn ia burom khyndiat lada ka kynthei ka bun kam kum ki shynrang kan long kaba eh namar ki don ki kam ba kim ki kynthei kin nym lah ban ha kaba ia dei bad ka peit miet peitngor, la ong ki don ki shnong kaba ki kynthei ruh kila long nongkit kam shnong.
Ha kane ka sngi ia ka jinglang la kam khmat da u bah Pius Rani Executive Director NESFAS, kong Merisha Nongrum kiba la lamphang ia ka jignialang bad ki long kmie kiba la wan ban ia shim bynta ki long na Umsawwar na Mawkynre Block, Plasha Umling Block, Laitsohpliah, Nongtraw na Sohra.
La ong kubma ka long mynta la don haduh 28 tylli ki shnong ba ia shim bynta ki kynthei ha ki dorbar shnong nad na kitei kila dn haduh 6 tylli ki shnong kaba ki kynthei kila shah jied kum ki dkhot ka executive member ha ka dorbar shnong.
